МЕШІТ ЖАМАҒАТЫНА ҚОҒАМДЫҚ ҚАУІПСІЗДІК ЕРЕЖЕЛЕРІ ТАНЫСТЫРЫЛДЫ (ФОТО)

«Әзірет Сұлтан» мешітінің бас имамы Ерболат Жүсіповтің басшылығымен жамағатқа ғимаратта қауіпсіздік ережелерін сақтау туралы ескерту парақшалары таратылды. Бұл бастама мешіт қызметкерлерінің жамағат қауіпсіздігін қамтамасыз ету және мүмкін болатын оқыс жағдайлардың алдын алу мақсатындағы жұмыстарының бір бөлігі.

Парақшаларда ғимаратқа кіріп-шығу ережелері, намаз оқу кезінде тыныштық сақтау, өрт қауіпсіздігі талаптары, эвакуация жолдары мен басқа да маңызды ақпарат көрсетілген. Сонымен қатар, арнайы кеңестер мен ескертулер көпшілікке түсінікті әрі қарапайым тілмен жазылған.

Мешіт қызметкерлері бұл шара жамағаттың қауіпсіздігін арттырумен қатар, ғимараттағы жалпы тәртіп пен ұйымдастырушылықты жақсартуға үлес қосады деп үміттенеді. Жамағат мүшелері бұл бастаманы қолдап, ережелерді ұстануға дайын екендіктерін білдірді.

«Әзірет Сұлтан» мешіті — елордадағы ең ірі діни ғимараттардың бірі. Мешітке күнделікті мыңдаған адам келетіндіктен, қауіпсіздік мәселесі әрдайым басты назарда.

Дереккөз: ҚМДБ Астана қаласы өкілдігінің баспасөз қызметі