ҚМДБ төрағасы Қособада мешіт қазығын қақты (ФОТО)

21 мамыр 2021 2555 0 Оқу режимі

Бас мүфти Наурызбай қажы Тағанұлы Батыс Қазақстан облысына жасаған сапарында Сырым ауданы Қособа ауылында салынатын жаңа мешіттің қазығын қақты.

Салтанатты ізгі іс-шарада Бас мүфти Наурызбай қажы Тағанұлы: «Мешіт – күллі жақсылықтардың тоғысқан мейірімділік мекені. Адам баласы мешіттен рухани күш алып қана қоймай, білім алады. Мұқтаж жанға көмектесіп, оның алғысына бөленеді. Осылайша қоғамда бауырластық, мейірім сынды адамдық қасиеттер салтанат құрады. Алла Тағала баршамызды осы мешіттің ашылуында жүздесуді жазғай. Жаратушы Иеміз осы мешітті халықтың игілігі мен бірлігіне қызмет етуін нәсіп еткей», – деді.

Игі басқосуда Бас мүфти Алла үйін тұрғызуға бастамашыл болған белгілі ақын Бауыржан Халиоллаға ізгі ниетін білдірді. Салтанатты іс-шарада ақын Мұхамеджан Тазабеков те құттықтау сөзін жеткізді. Мешіт қазығын қағу алдында құрбан шалынып, дұға жасалды.

Айта кетсек, Қособа ауылында салынатын мешіт 200 адамға арналған.