ÁKENIŃ PRINTsIPShILDIGI
Ótkende Erdos baýyrym atasynyń qyzyqty bir oqıǵasyn aıtyp berdi.
Atasy qazaq tili men qazaq ádebıeti pániniń muǵalimi ári mektep dırektory bolǵan eken. Segiz balasynyń jeteýi ózi sekildi óte saýatty, al kenjesi erke bolǵandyqtan, sabaǵyna salǵyrt bopty.
Kenjesi úıtip-búıtip mektep bitirgennen keıin áskerge attanyp kete barady. Ol kezde qazirgideı bir jylda jetip kep turmaıdy. Kemi eki jylǵa ketedi. Habar alysyp turatyn sotovyı da joq, tek hat jazysady.
Sodan áskerde júrip uly úı ishine hat jazady eken. Ákesi ulynan kelgen hatty ashyp, oqyp bolǵan soń, qolyna qyzyl qalamyn alyp, qateleriniń bárin shımaılap, túzetip shyǵady da, hatqa jaýap jazbastan keri salyp jiberedi eken.
Ol kezde hat qysqa ýaqytta jetip baratyn emes, aılap júrip barady. Balasy ákesinen “qyzylǵa boıalyp” kelgen hatyn qatesiz qaıta kóshirip jazady da, taǵy da salyp jiberedi eken. Ákesi de qatesi túzetilip kelgen hatqa ǵana jaýap jazatyn kórinedi. Mundaı jaǵdaı bir emes, ár kelgen hatta qaıtalanady eken.
Qarańyzshy, ákeniń saýatsyzdyqqa qarsy prıntsıpshildigi qandaı, á?..
Qazir áleýmettik jelilerdegi jastarymyzdyń ózara hat almasýlaryna kóz salsań, qateden súrinip jyǵylasyń. “Nestevatsyn”, “qoıshısh!”, “bosh!”, “neǵo”, “baratrm”, “qaravatrm” degenderden júrek aınıdy. Qudaı biledi, jastar bul sózderdiń qalaı durys jazylatynyn da umytyp qaldy-aý osy…
Al siz áleýmettik jelide jazý saýattylyǵyna mán beresiz be?
