ÁKENIŃ UZATYLYP BARA JATQAN QYZYNA AITQAN ÓSIETI

Ilgeride qyzyn uzatqaly otyrǵan bir ǵulama qyzyna arnap mynadaı ósıet aıtqan eken: Qyzym, ákeniń qyzǵa aqyl aıtqany orynsyz shyǵar, alaıda bul ósıet aqyl aıta almaıtyn keıbir ata-analarǵa úlgi bolsyn. Sen ózińdi erkeletip, alaqanyna salyp, aıalap otyrǵan ortadan anaý-mynaý qateligińdi kótere almaıtyn uıaǵa uzatylyp bara jatyrsyń. Endigi jerde ózińe eshqashan dos tutpaǵan adamdy dos tutasyń. Onymen birge ómir súresiń. Keıde kóńilińe qaıaý túsýi múmkin. Sol kezde ákeńniń myna bir sózderin jadyńa tut:

Birinshiden, kúıeýińniń kózine saq bol. Iaǵnı onyń kózine kir, jarasymsyz, jaman kıimmen kórinip qalma. Onyń aldynda ózińdi únemi taza usta. Ol seni tek ádemi qalpyńda kórsin. Sebebi, Paıǵambarymyz (oǵan Allanyń ıgiligi men sálemi bolsyn):

«Kimde-kim úıine kelse, daýsyn qyrnap nemese dybys berip, áıeline óziniń kelgenin bildirsin», - degen. Mundaǵy danalyq – áıel adam taranyp, sylanyp-sıpanyp, óz-ózin rettep alýyna múmkindik týdyrý. Paıǵambarymyz (oǵan Allanyń ıgiligi men sálemi bolsyn) joryqtan kelgende úıine kúndiz emes, tek túnde kiretin bolǵan. Óıtkeni, sapardan kelgen adam sharshap, ústi-basy retsiz bolatyndyqtan, áıeline jaman keıipte kórinip qalmaýǵa tyrysqan eken. Sondyqtan onyń aldynda únemi jarasymdy kıinip, ádemi bolyp júrýge tyrys.

Ekinshiden, onyń ıiskeý, sezý múshelerine saq bol. Ózińdi taza usta. Onyń murnyna jaman ıis barsa, bul aradaǵy mahabbat pen sezimge syzat túsirýi múmkin.

Úshinshiden, onyń asqazanyna saq bol. Kúıeýińniń tamaq ishetin ýaqyttaryn qadaǵala. Sebebi, qarny ash adam úrleseń janyp ketetin shoq sekildi ashýshań keledi.

Tórtinshiden, kúıeýińniń uıyqtaıtyn ýaqytyna saq bol. Sebebi, Alla adamdarǵa túndi tynyǵý úshin jamylǵy etken. Túste kelip, bir sát myzǵyp alýdy oılasa, úıde tynyshtyq bolýyn qadaǵala. Eger erkektiń qarny ashyp, uıqysy qanbasa, onyń kóńil-kúıi buzylyp, aralaryńda renish týýy múmkin.

Eger kúıeýiń úıge qýanyp kelse, eshqashan qabaǵyńdy túıip, muńaıyp qarsy alma. Jáne kerisinshe, kóńil-kúıi túsip, qaıǵyryp kelse, kúlip qarsy alma. Ol qýansa, birge qýanyp, ol muńaısa, birge muńaıý – áıeldiń oǵan bárinen artyq janashyrlyq tanytatyn jaqyn adam ekenin ańǵartady.

Kúıeýińniń jaqsylyǵyn asyr, jamandyǵyn jasyr. Ony únemi ózge ortada maqtap júr. Qatelik-kemshilikterin jasyryp, búgip qalýǵa tyrys. Ózińniń haqyńnan kúıeýińniń haqysyn árdaıym joǵary qoı. Sonda ǵana ıgilikke qol jetkizesiń. Onyń syryn, qupııalaryn saqta. Otbasyńdaǵy jaǵdaılardy kópke jarııalap, syrtqa jaıma.

Osy aqylymdy jadyńa tutyp, is júzinde amalǵa asyra alsań, men ózimdi baqytty ákemin dep esepteımin. Sebebi, ata-ana úshin balalarynyń qyzyǵyn kórýden asqan baqyt joq. Endeshe, aq jol, qyzym!

Alla abyroılaryńdy asyryp, senderdi Ózinen basqa eshkimge muqtaj qylmasyn!

Abdulakhad Smanov