"ÁKESI TIRI KISI BAS USTAMAIDY"

19 qańtar 2024 1066 0
Оqý rejımi

Adamnyń Alladan keıingi piri - ózin ómirge ákelgen ata-anasy. Qazaqta Áke - Basıe, ol shańyraqtyń tiregi, ol - otbasynyń tutqasy. Osyndaı aldyńda asqar taýdaı Áke turǵanda balasy bas ustap, ákesiniń jolyn kesýdi oıyna da almaǵan, bul qazaqtyń uǵym-túsinigine múlde jat qylyq.

Tipti ózi balaly-shaǵaly bolyp kekse tartsa da, ákeniń kózi tiri bolsa, bas ustamaıdy. Qaıta ákeniń amandyǵyn tileıdi, óziniń áli de ákeli "bala" ekenine shúkirshilik etedi. Endi she, ár adamda áke bireý-aq emes pe!

Áke ómirden ótken jaǵdaıda kórshi-kólem, dos-jaran, jekjat-jurat marqumnyń qyrqy ótken soń qaraly úıdiń qamkóńil adamdaryn qonaqqa shaqyrady. Ony bir jerde - "kóńilshaı", taǵy bir óńirde "jubatýshaı" nemese "eńse kóterý" dep te ataı beredi. Qalaı atalsa da, basqanyń qaıǵy-qýanyshyn kóterise biletin kóńilge qaraǵysh halqymyzdyń bul da - bir tekti ǵurpy. Osyndaı qonaqtyqta jón biletin úlken kisilerdiń biri ulǵa:

"Qaraǵym, endi ákeniń orynyn joqtatpaı shańyraqqa ıe bolatyn sensiń. Otbasyńnyń bereke-qutyn jutatpaı úı ishińe qamqor Basıe bol, ákeńniń tútinin túzý shyǵarýyńa Alla násip etsin!" - degen sekildi tilekterdi aıtyp, aldyna bas tartady. Bul - ásheıin bas mujý emes, azamatqa júktelgen úlken mindet.

Baýyry bútin kim bar deısiz, osy jaǵdaı bizdiń de basymyzdan ótti.

Bákeń - Baqytjan Momyshuly baqılyq bolǵanda bizdi de "kóńilshaıǵa" janashyrlar birinen soń biri shaqyryp kóńilimizdi demedi.

Sonda tańǵalǵanym - ulym Erjannyń aldyna bas usyný eshkimniń oıyna kelmegeni. Ádettegideı dastarqan basynda otyrǵan jasy úlkender ózderi bas ustap jatty. Jasyryp qaıteıin, kádimgideı kóńilime keldi, áıtse de, únsiz júrdim.

Biraq kúttim.

Bir kúni ataqty ánshi qyzymyz Maqpal Júnisova shaıǵa shaqyrdy.

Dardaı mosqal er-azamattar bilmegen dástúrdi únemi sahnada júretin ánshi biledi dep ıegim qyshyǵan joq. Alaıda sol Maqpal:

"Baqytjan aǵa osy úıge kelgende bas ustaýshy edi, endi bas - seniń sybaǵań, aınalaıyn!" - dep balamnyń aldyna bas qoıdy. Sóıtip, meniń kúpti bolyp júrgen kóńilimdi bilgendeı, bul joly Maqpal kóregendilik kórsetti.

 

Zeınep Ahmetova "Kúretamyr"

 

Pіkіrler Kіrý