ALLA ÚShIN BOLMAǴAN KEZ KELGEN AMAL BEKERShILIK
Hýd súresiniń 15 jáne 16-shy aıattary Alla Taǵalaǵa ıman etpese de dúnıede baılyq pen sán-saltanatta raqat ómir súrýshiler jaıynda. Bul aıattar bylaı tápsirlengen:
Amaldar nıetke baılanysty. Sol úshin maqsaty tek dúnıe bolǵandardyń eńbegi men yqylastarynyń qarymy myna dúnıede tolyǵymen, tipten artyǵymen berilip, túgesiledi. Iaǵnı kimde-kim Allaǵa jáne Rasýlyna senbeı, dinı, aqyrettik múdde kózdemeı, tek dúnıelik ómir men sonyń raqatyn tilese, muraty men nıeti tek sony kóksep, sol úshin eńbektense, amaldarynyń qarymyn da osy dúnıede qalaı da alady.
Budan “Olardyń báriniń búkil dúnııaýı maqsattary oryndalady” degendeı maǵyna shyqpaıdy. Budan túsinetinimiz mynaý; eńbektengenniń bári qajyry men amalynyń qaıtarymy retinde sózsiz bir nátıjege qol jetkizedi. Bul qalaýy oıyndaǵydaı bolmaǵanmen, amalynyń qunynan kem bolmaıdy. Eńbekteriniń nátıjesi retinde olar dúnıede saýlyqqa, mansap pen qyzmetke, turmystyq molshylyqqa, t.b. qaýyshady. Alla men Rasýlyna senbese de, qoldaǵy múmkinshilikterimen joq-jitikke kómektesip, jol, kópir, sý qubyry saldyrǵanmen, bulary ózderine aqyrette esh paıda bermeıdi. Alla Taǵala olarǵa bul amaldarynyń qarymyn dúnıede beredi.
Sol úshin eń basty maqsattary pánı dúnıelik ómir men sonyń raqaty bolǵan jannyń istegenderiniń qarymy da osy dúnıeden árige barmaıdy. Máńgilik aqyrettik ómirge jetpeıdi. Olar maqsattary men nıetterine saı kúsh-jigeri men amaldarynyń barlyq paıdasyn dúnıede kórgen, bitirgen. Aqyrette olarǵa ottan basqa eshteńe joq. Óıtkeni dúnıelik ómir jaratylysynan pánı bolǵandyqtan, ony ustap qalý, árleý qalaı qylǵanmen de qur áýreshilik. Ajal jetkende eshkimdi qaldyrmaıdy, sypyra áketedi. Anyqtap aıtqanda, Alladan basqa bári pánı bolǵandyqtan, tek Alla rızashylyǵy úshin istelmegen kez kelgen amal bekershilik.
