ANAŃDY SYILA (Ǵıbratty áńgime)

Bul qaýym kóship-qonyp júrip ómir súrýdi ədetke aınaldyrǵan edi. Aralarynda óte qartań anasy bar bir kisi de boldy. Anasy jasynyń úlkendigi sebebinen ara-tura aljyp, esin joǵaltyp, perzentine qatty jabysyp alatyn da, odan aıyrylǵysy kelmeıtin. Onyń bul qylyqtary ulyn sharshatyp, júıkesin tozdyryp, qaýymy arasynda tap bir osy sebeppen abyroıy tógilip júrgendeı sezindirdi. 

Kúnderdiń bir kúninde olar taǵy da ədetine oraı basqa jaılaýǵa kóshpekshi boldy. Ol əıeline:

- Eı qatyn, erteń kóshetinimiz məlim. Anamdy bilesiń - aýrý. Ony syrtta qaldyr. Bireý kórip qalsa, raqymy kelip alyp keter. Jasy da kekseıip qaldy. Jol júrýge de jaramaıdy. Əbden mezi etti. Oǵan biraz jeıtin tamaq pen ishetin sý qaldyr. Bireý-mireý kórse ózimen alyp keter ıakı ajaly jetse - óler... - dedi.
Əıeli:
- Degenińiz bolsyn qojaıyn. Alań bolmańyz. Aıtqanyńyzdy artyǵymen oryndaımyn! - dep jaýap berdi.
Erteńgi kúnde keldi. Barlyǵy dúnıe-múlkin jınady. Əıel de kúıeýi aıtqandaı qaıyn enesine talǵajaý etetin azyq pen ishýge sýyn qaldyrdy. Sonymen kóshpeli qaýym kerýenimen jańa jaılaýǵa qaraı bet alyp kete bardy.

Olar kúnniń jarymynda tynyǵý úshin toqtady. Anasyn eski qonysta qaldyrǵan kisi əıelin shaqyryp ulyn janyna əkelýin surady. Onyń jalǵyz ǵana bir jasar uly bar edi. Ol ulyn óte qatty jaqsy kóretin, jıi erkeletip, qushaǵyna alyp, mańdaıynan ıiskeıtin. 

Əıeli onyń suraǵyna úndemedi.

- Ulymdy alyp kel dedim ǵoı saǵan! - dep zekip qaıta surady. 
Əıeli:

- Ony anańyzben qaldyrdym. Bizge onyń qajeti joq, - dedi saspaı. 

Muny estigen kúıeýi ústine bireý muzdaı sýdy quıa salǵandaı əser alyp, aıqaılap jiberdi:

- Ne úshin?

Əıeli:
- Óıtkeni ol da bir kúni eseıedi. Anańyzdy elsiz eski qonysqa qaldyrǵanyńyz tərizdi, ulyńyz da sizdi  tastap ketedi, sizdiń istegen isińizdi qaıtalaıdy, mundaı perzenttiń bizge keregi joq, - dedi jaıbaraqat.

Əıeliniń bul jaýaby oǵan naızaǵaı túskendeı əser etti. Atyn júgendep eski qonysqa qaraı shaba jóneldi. Kóshken qonystaryna qas qaraıǵan shaqta kelip jetti. Ədette dúıim jurt kóshse, olardan qalǵan-qutqan nərselerdiń arasynan tamaq izdep, jabaıy jyrtqysh ańdar keletin. Jan-jaǵyna qaraǵany sol, bir shette anasy onyń ulyn baýyryna qatty qysyp alǵan, ekeýiniń aınalasyn shabýylǵa daıyn turǵan bir top ash bóriler qorshap tur eken. 

Qart ana:

- Joǵalyńdar, bul meniń ulymnyń jalǵyzy. Tıispeńder! Kózderińdi qurtyńdar! - dep, olarǵa tas laqtyryp otyrǵan-dy. 
Muny kórgen kisiniń júregi órekpip, qolyna myltyǵyn aldy da, bórilerdiń birin atyp, sulatyp túsirdi. Qalǵandary myltyqtyń daýysynan qasha jóneldi. Ol lezde atynan túsip anasyn qushaǵyna aldy.

Bet-júzin kózderinen aqqan jasy jýyp, ashy óksikpen:
- Anashym, meni keshirińizshi! - dep, san ret qaıtalady...

Olardy atyna mingestirip, jańa qonystaryna qaıtty. 
Sodan keıin bul kisi anasyna erekshe meıirimdi boldy. AllaH Taǵala oǵan dana əıel nəsip etkenine qýandy. Endi ol basqa jaqqa kóshetin bolsa eń əýeli anasyn túıege mingizip, ómiriniń sońyna deıin oǵan qyzmet qylýǵa bel baılady...