AQYRETTIŃ ÝAIYMY

Bir kúni Bıbi Fatıma Ázireti Áliniń júzinen ýaıymnyń izin kórip: «Ýa, Álı! Ýaıymyń bul dúnıelik bolsa, bul bizge jaraspaıdy. Al eger aqyret úshin bolsa, aıt, birge ýaıymdaıyq!» – deıdi.

Abaıdyń oı keselderiniń birine jatqyzǵan «ýaıymsyz salǵyrttyǵy», bálkim, osy aqyret ýaıymsyzdyǵy, aqyret qaıǵysyzdyǵy bolar. «Aqyl keseli degen tórt nárse bar. Sodan qashyq bolý kerek. Sonyń ishinde «ýaıymsyz salǵyrttyq» degen bir nárse bar, zınhar, janym, soǵan bek saq bol, ásirese, áýeli, Qudaıdyń, ekinshi – halyqtyń, úshinshi – dáýlettiń, tórtinshi – ǵıbrattyń, besinshi – aqyldyń, ardyń – báriniń dushpany. Ol bar jerde bular bolmaıdy», – deıdi Hakim Abaı.

Adamdy bul dúnıede Qudaıdyń da, halyqtyń da, dáýlettiń de, aqyldyń da, ardyń da, ǵıbrattyń da aldynda jaýapty qylatyn, jaýapkershilikti sezindiretin tek qana aqyretke degen senim, aqyretke degen ıman. «Erteńgi kúni Qudaıdyń aldynda ne dep jaýap beremin?» degen aqyrettik ýaıym bolmasa, pende bul dúnıede ár nársege salǵyttyq tanytyp, nemquraılylyqqa boı aldyrady. Ol pende aqyrettegi jaǵdaıyn ýaıymdamaǵandyqtan, Qudaıdyń da, halyqtyń da, memlekettiń de, ardyń da aqysyn aıaqqa taptap, bylyqqa belshesinen batyp júre beredi.

Aqyrettiń ýaıymy barda adamnyń aqyl-oı júıesi de saý bolady. Sebebi, árbir isti aqyrettik esep úshin oılastyrady. Bul dúnıeniń múddesin ǵana kózdegen is te, oı da kemel emes, kesel bolmaq...