ÁÝLIESIŃ, ÁMIRENIŃ JÚNISI!...
"Shúkir ettik bolǵanyna bir Alla,
"Joq" bizderdi "bar" etken soń kóz jetti.
Shyndyǵynda bizder jalǵan, shyn- Alla,
Mal-dúnıege qol sozyp ne kózdepti?"
(Júnis Ámire)
Bissimillá dep bastaıyn sóz basyn,
Balqyp jatty mıymda oı-qorǵasyn.
Haq jolynan baq izdegen er shaıyr,
Jaratqanym, oǵan daǵy ber qaıyr.
Qoja Ahmet Iassaýıdiń jolymen,
Islam bolyp qaǵıdasy janyna em.
Dárýish bop kezdi óleńmen el ishin,
Ǵıbadat qyp Haqtyń jolyn sonymen.
Erin kepse qııamette tamshy zar,
Qysyp keýde, kúnálarmen janshylar.
Múńkir-Náńkir eki jaqtan kelgende,
Izgi amalym, bir saýabym bar shyǵar?!
Syrqatyma shıpa bolmas kóz jasym,
Turpatyma bóz kóılek te jarasar.
Áı, Ámire, hıkmet-jyryń tozbasyn,
Táýhıd etken tilegińmen para-par.
Bulbul gúlge ǵashyq edi baqtaǵy,
Qus tilinde shaıyr talaı ún qatty.
Tamyp tústi kóz aınamnan jas taǵy,
Qudaı súıgen quldaryna qymbatty.
Tirligimniń óńi túgil, túsi alań,
Ushsa deımin kókterimniń qusy aman.
Áı, Ámire, Mahshar barsam ne deımin?
Aqyndyǵym-tatyp alǵan kúshálam.
Ajal-Ámir qasha almaımyz bárimiz,
Aq shúberek jabatuǵyn tánimiz.
"Aýzyn ashsa aqym bolyp qara jer",
Jetsin tilder, kálımaǵa halimiz.
Toltyr deısiń ımanyńnyń ketigin,
Qara qurttaı shaınaı berse jegi muń.
"Haqtan násip bolsa janǵa mártebe",
Bes paryzyń-eki dúnıe sheshimiń...
Shemen júrek qara tastaı úgildi,
Gúl-haýyzdaı aýyr oılar búgildi.
Amanat qyp tastap ketken bizderge,
Shaıyrlyqtan sharıǵattyq júgińdi.
Jalǵanymnyń jaltaq shigi, búgisi,
Taǵdyrlardyń joly qısyq, júrisi.
Bir ózińe sansyz alǵys, Jaratqan!
Ásel OSPAN
