Ajyrassaq qalaı bolar eken?..
Úılengenderine azdy-kóp ýaqyt bolǵan, endi-endi otbasylyq ómirdiń keıbir qıyndyqtarmen júzdese bastaǵan eki jas jubaıdyń sońǵy kezderde urys-keristeri kóbeıe túsedi. Aralarynda birneshe ret oryn alǵan janjaldyń, aıtylǵan aýyr sózderdiń nátıjesinde bir-birlerine degen kóńilderi de sýyı bastaǵan. Jıi qaıtalana bergen osy keleńsizdikterdiń birinde jas jubaılar ajyrasýǵa bel býady. Qabyldaǵan sheshimderin aldymen úıdegi qarııaǵa aıtpaq bolyp, jigit ákesiniń bólmesine barady. Ákesi namazyn oqyp bolyp, endi Qurandy ashqaly jatyr eken. Qarııa erli-zaıypty bul eki jastyń ortasyna aralasa bermeıtin. «Kósh – júre kele túzeler»,- dep jaqsylyqtan úmitin úzbeıtin. Alaıda bólmege kirgen balasynyń búgingi júzinen mán-jaıdy túsine qoıǵan ákeı, balasy sóz bastamastan «Kelin qaıda, balam? Shaqyra ǵoı», -deıdi. Kelini kirip, sálemin bergennen keıin, qarııa batasyn berip, Qurandy ashyp bir aıat oqyıdy:
ۚوَعَاشِرُوهُنَّ بِالْمَعْرُوفِ فَإِن كَرِهْتُمُوهُنَّ فَعَسَىٰ أَن تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا
«Balalarym, bul aıatta Alla Taǵala bizge: «Jubaılaryńmen jaqsy qarym-qatynasta bolyńdar. Eger olardy unatpaı qalsańdar (sabyrlylyq tanytyńdar), qaıdan bilesińder, bálkim, Alla sender unatpaǵan nárseniń artyn qaıyrly qylyp, kóptegen jaqsylyqqa ulastyrýdy qalaıtyn shyǵar»[1],-deýde»,- deıdi. Sonda balasy: «Áke, bul aıatty qalaı túsinemiz? Bizdi ajyrasýǵa deıin alyp kelgen boıymyzdaǵy jáne minezimizdegi bul kemshilikterden qandaı qaıyr kútýge bolady?»,-deıdi. Sonda ákesi: «Qandaı qaıyr kútýge bolatynyn Alla Taǵala ýaqytymen kórsetedi. Sender sabyr saqtap, bir-birlerińe shydasańdar, Alla Taǵala ýádesinde turmasyn ba?», dep ákesi olarǵa joǵarydaǵy aıatqa túsinik beretin «Eki kirpi» oqıǵasyn baıan etedi...
Qys kelgende eki kirpi úsip qalmastan aman-esen qysty ótkizýdiń sharasyn izdeı bastaıdy. Kirpilerdiń bireýi: «Bizdiń basqa janýarlar sııaqty júnimiz joq qoı, endi bul qystan qalaı shyǵamyz»,- deıdi. Ekinshisi: «Bir-birimizge arqamyzdy qaratyp jataıyq. Osylaısha birimizdi birimiz jylytqan bolamyz»,- deıdi. Álgi kirpi: «Tikenderimiz janymyzǵa batadyǵoı»,- deıdi. Ekinshisi: «Eshteńe etpes, múmkin, shydaıtyn shyǵarmyz»,-dep ekeýi birine biri arqalaryn qaratyp jatady. Alaıda, ýaqyt óte tikenekteri jandaryna batqanda, bir-birine shydaı almaıtyn halge jetedi. Ekeýi: «Endi bulaı bolmas, bólek-bólek ketkenimiz taǵy durys bolar»,- dep bir-birinen alshaqtaıdy. Osylaısha tikenniń jarasy jazylady. Alaıda, olardy endi sýyq shydatpas hálge ákelgen eken. Qystyń yzǵarynda bir- birinen ajyrap qalǵan bul eki kirpi birin biri qaıta taba almaǵan eken»,- dep qarııa sózin aıaqtaı kele: «Balalarym, birge turý qıyndyqsyz bolmaıdy. Alaıda, aıyrylysý budan da qıyn bolýy múmkin»,- deıdi.
