Balamyz bolsa, ajyraspas edik
«Bosaǵasyn altynnan soqsań daǵy, bala súımeı adamnyń meıiri qanbaǵan». Úı ishinen náresteniń kúlkisi shyqpaýy, besiktiń terbelmeýi men oıynshyqtyń syldyry estilmeýi otbasy úshin úlken qasiret. Adam taǵdyryna Jaratqannan basqanyń ámiri júrmesi anyq. Boıǵa sharana bitpeýi týa bitken dert nemese keıinnen kelgen keselden bolýy yqtımal. Belgili bir sebepke júginý biz úshin úırenshikti másele. Kóbinese sebebin izdep, sol sebeptiń saldarynan qutylýǵa tyrysamyz. Biraq biz ár istiń ar jaǵyndaǵy astaryn barlap kórýge tyryspaımyz. Bolǵan nárseniń barlyǵy bir Allanyń qalaýy, bir Allanyń ámiri.
Deni saý qanshama adamdarǵa da bala bitpegen. Boıǵa sharana bitken kúnniń ózinde de túsik tastaýy, toǵyz aı kótergen náresteniń shetinep ketýi, ósirip, baǵyp-qaqqanda ata-anasynyń kóz aldynda dúnıeden ozýy da múmkin ǵoı. Sebebi, bul ómir synaqtan turady. Alla basymyzǵa salǵan barlyq synaqtyń sońynda qaıyry bolaryn esten shyǵarmaǵanymyz jón. Mysaly, bir qalaaralyq avtobýsqa mine almaı qaldym dep kúıinip, úlgermegeni úshin jurttyń bárin sógip, kinálaǵan adam sol avtobýstyń jol apatyna ushyraǵanyn estigende sabasyna túsip, ashýy qaıtary sózsiz. Osy turǵydan alǵanda kópshilik ár nárseniń jaqsylyǵy bolaryna kóz júgirte bermeıdi.
Oqýǵa túsemiz, jumysqa turamyz, úılenemiz, úı bolamyz, bala súıemiz, bastyq bolamyz, qartaıamyz. Mundaı merekeli de, berekeli ǵumyr keshsek qýanyp, kerisinshe órbise ókpeleıtinimiz nesi? Ómirimizdiń keremet bolýy úshin taǵdyrǵa ótkizip qoıǵanymyz bardaı, oılaǵanymyz bolmasa kúıinip ókinýimiz durys pa? Ár atqan tańda sol kúnimizdi maǵynaly ótkizýge, adamzat ataýlyǵa paıda keltirýge degen jańa bir qadam jasaýǵa kúsh-jigerimiz daıyn tursyn. Ár kúnimizdi qur kúıbeń tirlik qamymen óltirmeı, adamgershilikke, súıispenshilik pen meıirimdilikke toltyra bileıik. Kitap oqyńyz, ónermen aınalysyńyz, til úırenińiz, aǵash sýaryńyz, kóshede júrgen kúshikke bir úzim nan tastańyz, aınalańyzdaǵy adamdarǵa sálem berińiz, bireýdiń halin surańyz. Ǵumyryńyzdyń maǵynasyn arttyrý óz qolyńyzda.
