Bálkim, bul sizdiń sońǵy Ramazanyńyz bolar...
Tilekterdiń tizgini tóreliginde bolǵan, asa maqtaýly kúlli ǵalamnyń Rabbysy Allaǵa sheksiz shúkir aıtamyz! Alla tarapynan adam balasyna berilgen sansyz saýaptardyń sarqylmas qaınar kózi, aılardyń sultany bolǵan Ramazan aıy – halal nyǵmetti eń az mólsherde paıdalaný arqyly nápsi, rýh jáne tándi tárbıeleıtin qaıyrly syı. Soǵan baılanysty artyqshylyqtarmen ardaqtalǵan atalmysh aıdy barynsha tıimdi, aldaǵy kúndi súıinshige toltyratyn laıyqty ǵıbadatpen ótkizgen lázim.
Adamzattyń abzaly sanalǵan Alla rasýly «Kimde-kim bul aıdyń jaqsylyqtarynan maqrum qalsa, ol aqıqattan da qur alaqan qalady» (Ahmet, Bıhaqı rıýaıat etýimen) dep, úmitti bolǵan úmbetine Ramazan aıynyń mańyzy men ulyqtyǵyn pash etýimen úndeý salady. Sondaı-aq qazaqtyń «bas aqyny», oıshyl Abaıdyń «Tolyq adam» kontseptsııasyna laıyq jalǵyz ǵana tulǵa áz-paıǵambar Muhammed (s.ǵ.s.) Ramazan aıyn yntyqqan ystyq yqylaspen hám qyzý daıyndyqpen qurmet etip, qarsy alatyn. Sáıkesinshe ǵıbadat-qulshylyqtaryn qulyqty túrde, ıhsannyń bıik minberinde atqaratyn. Ǵalamnyń Rahym nury paıǵambarymyz taraýıh namazdarynyń bir rakaǵatynyń ózinde Quran Kárimniń bes parasyn oqıtyn. Sózimizdiń tuzdyǵy, sańlaq sahaba Hýzáıfanyń (r.a.) aıtýynsha, paıǵambarlar padıshasy bir kesh boıy tórt rakaǵat namazda Baqara, Álı-Imran, Nısa, Máıda, Anǵam súrelerin qyraǵat etken. Dál sol sátterdegi rúkýǵ pen sájdelerin de uzaǵynan oqıtyn. Bul týraly Aısha(r.a.) anamyz: «Allah Rasýlynyń keshki namazdaryndaǵy rúkýǵ pen sájdelerdiń uzaqtyǵy bizdiń elý aıat oqyǵanymyzdaı uzaq», – degen (Mýslım rıýaıat etken). Ashabı kıramnyń sap basy, saf altyny hazireti Omar (r.a.) jamaǵatpen bir Ramazanda úsh ret Quran hatym túsirgen.
«Ramazanda oraza ustaýshynyń uıqysy da ǵıbadat». Áıtse de, qazany qasıetke toly múbárak aıdy uıqymen ótkizbeske kerek. Taraýıhtan keıingi et asym ýaqyt sáresiniń arasyn uıqymen emes, qulshylyqpen ótkizý abzal is. Qulshylyq sheńberi tek namaz oqýmen shektelmeıtini sekildi dinı tanymdyq, tarıhı kitaptardy oqý ilim alýmen keńeıe túsedi. Kúnińizdiń kóp bóligin «ólimniń egizi» arsyz uıqymen ótkizý de jaqsy emes. Durys, bul sizge tym qıyn bolyp kórinýi múmkin. Alaıda, jyl on eki aıdyń ıgiligi men izgiligin syıdyrǵan Ramazan aıy bar-joǵy otyz kún. Esesine, sabyrlyq, qanaǵat, tabandylyq pen nápsini qolǵa alý sekildi adamı qasıetterimizdi shyńdaı otyryp, ahlaǵymyzdy kámildendirý arqyly Iemizdiń razylyǵyna qol jetkizesiz. Bir aı nápsińizge quryq salyp, júrek tazalyǵyn tunyqtandyrýǵa jol ashyńyz. Nápsige nasıhat qylyńyz, kitap oqyńyz, qaza, nápil, tahajýd namazdaryńyzdy oqyńyz. Aılardyń sultany men túnderdiń qaıyrlysy toǵysqan qasıetti aıda qatalaǵan júregińizdi shólin haqıqattyń qaınarynan qandyryńyz. Bul aıdy shyn máninde múbárak etip ótkizińiz!
Bálkim, bul sizdiń sońǵy Ramazanyńyz bolar... Oılanyp kórińiz.
Asan Anarbaıuly
