Bári araqtyń kesiri...
Bir memlekettik qyzmette isteıtin dosym aıtyp berdi. Bir joldas balam bar edi dep bastady ol áńgimesin. Áskerı polıklınıkada júrgizýshi bolyp qyzmet atqarady eken. Sodan bir kúni álgi jigittiń aǵasy úıinde qonaq kútedi. Oǵan jańaǵy jigit te barady. Otyrysta ishimdik ishiledi. Álgi jigit te azdap urttaıdy. Otyrys aıaqtalyp, qaıtatyny qaıtyp, qalatyny qalady. Ol úıde qonýǵa nıettengen qonaqtardyń kóp ekendigin túsingen álgi jigit basqa úıge baryp, qonbaq bolady. Ol úıi bar bolǵany eki-aq aıaldamalyq jerde eken. Soǵan jaıaý júrýge erinip, aǵasynyń kóliginiń kiltin surap alady. Ishkenimen qoımaı, syrtqa shyǵyp kólikke otyrady. Kólikti otaldyryp, sál júrgennen keıin aldynan JPP qyzmetkeri shyǵa kelgen. Toqtatqan. Tekserý barysynda álgi jigittiń ishimdik ishkeni anyqtalady. 40-50 myń berem deıdi. JPP qyzmetkeri kónbeı, protokol toltyryp, kólik júrgizý kýáligin alyp tynady. San soǵyp qalǵan álgi jigit júrgizý kýáliginen aıyrylǵannan keıin qaıtsin? Jumystan shyǵady da. Osydan artyq ókinish bolar ma? Bas aman bolsa, eki qolǵa bir kúrek tabylar-aý. Degenmen, álgi jigit jumystan shyqqannan keıin bir aptadan soń áriptesterine áskerı ataq (buryn olar jaı júrgizýshi bolǵan) berip, qosymsha syıaqy taǵaıyndapty. Aılyqtaryn da kótergen (buryn da aılyqtary jaman bolmaǵan). Osyny álgi jigit áli kúnge ókinishpen eske alady, - deıdi joldasym. Bári araqtyń kesiri...
Taǵy bir bastyǵymnyń basynan mynadaı oqıǵa ótken dep jalǵastyrdy ol áńgimesin. Jumysymyzda bir bólim bastyǵy bolatyn. Ol da bir kúni otyrysqa barady. Ol jerde araq qoıylady. Álgi bastyǵym ishkennen keıin kólik júrgizýden seskenip, sol dosynyń úıine qonýdy jón kóredi. Sodan tańerteń: "Mas emespin ǵoı", - dep kóligimen úıine jetip alýdy oılaıdy. Sóıtip, kólikke otyryp, jolǵa shyǵady. Jolda tynysh barmaı, shylym shekpesi bar ma? Onyń kúlin kúlsalǵyshqa emes, terezeden syrtqa tastaǵanyn qaıtemiz? Dál sol kezde onyń kóliginiń artynan JPP kóligi kele jatyr eken. Kósheni lastaǵan álginiń ádepsizdigin baıqap qalyp, birden toqtatady. Onyń kóligine jaqyndaǵan JPP qyzmetkeri qujattaryn talap etedi. Kenet jaǵymsyz ıis seziledi. Araqtyń túrlengen ıisi múńkip turǵandaı. Sál ýaqyt ótken soń bastyǵymnyń ishimdik ishkenine tolyq kózi jetken JPP qyzmetkeri aıyppul jazyp, kólik júrgizý kýáliginen aıyrady. Kóp ýaqyt ótpeı-aq bastyǵymdy jumystan shyǵardy. Sebebi, memlekettik qyzmetkerler ákimshilik jaýapkershilikke tartylsa, olarǵa keshirim joq. Birden jyly ornyn bosatyp, kete barady, - dedi joldasym. Bul da araqtyń kesiri...
Ótkende kúzet polıtsııasynda da bir jigit jumystan shyǵarylypty. Ol da araqtyń sebebinen... Mas emes. Biraq, keshegi ishken araǵynyń ıisi bar. Ony baıqaǵan komandırler álgi qyzmetkerdi jumystan shyǵarýdy uıǵarady. Jaı shyǵara salmaǵan. Arnaıy qatań buıryqpen shyǵarǵan. Bul degenimiz endi ol jigit eshbir memlekettik qyzmetke tura almaıdy. Taǵy da araqtyń kesirinen...
Ardaqty Paıǵambarymyz (s.ǵ.s.) óziniń beligili hadısinde: «Araq – barlyq jamandyqtyń kilti» degen. Paıǵambarymyzdyń (s.ǵ.s.) osy aıtqany qaı jaǵynan alsaq ta dáleldenip keledi.
Nurqanat Baızaq
