BOSAǴAŃ DIRILDEMESIN DESEŃ…
Kúıeýge shyqqan qyz tórkinine jalǵyz kelse "Kúıeýi men enesin jamandaıdy" dep bosaǵa dirildeıdi...
Birde mynadaı bir oqıǵa boldy. Jubaıym Bákeń birsydyrǵy, salmaqty bolǵanymen, ashýlansa syǵyp alatyn minezi bar edi.
Al, men aıtarymdy sart etkizip aıta salyp, bar páleni tilimnen tabatynmyn. Endi otbasy bolǵan soń ydys-aıaq syńǵyrlamaı turmaıdy ǵoı.
Bir kúni ol bir nársege ashýlanyp meni shapalaqpen tartyp qalmasy bar ma?! Ashýǵa býlyqqan men «qaraı gór, mynany, Momyshulynyń balasy bolsań qaıteıin?! Men de baqandaı bes ul balanyń ortasynda ósken erke, jalǵyz qyzbyn» dedim de esikti tars jaýyp, tórkinime ketip qaldym.
Úıge kelgen soń anama Bákeńdi jamandap jatyrmyn. Aıtarymdy aıtyp, ol kisini jerden alyp, jerge salyp, biraz jerge aparyp tastadym ǵoı deımin.
Ózimshe «qatelesippin, ol men oılaǵan adam emes eken» dep kózimdi jumyp alyp, jylap, bar nazymdy, ókpemdi aıtyp jatqanymda, kenetten kózimniń oty jarq ete qaldy!
Kózimdi ashyp qalsam, dál aldymda sheshem tur! Qap-qara bolyp, tútigip ketken. «Tyı, kózińniń sorasyn. Namys qaıda!» dedi.
Aldynda ashynyp jylaǵan men sońynan qorlanyp jyladym. Biraq, aıap turǵan sheshe joq. Anam ne bir japyraq nan bermedi, ne bir staqan sý bermedi. Úıden qýdy da jiberdi,-dep áńgimesin sabaqtady.⠀
«Jaqsy áıel úıdiń berekesi, jaman áıel erdiń kelekesi», «shyqqan qyz shıden tysqary» degen. Turmys qurǵan qyz bala úshin óz ákesiniń úıi saǵynyp qana kelip, aýnap-kýnap, erkelep ketetin ǵana jer bolýy qajet.
Jáne kúıeýge tıgen qyz tórkinine jalǵyz emes, kúıeýimen kelgeni abzal. Jalǵyz kelse bosaǵa «kúıeýin jamandaıdy, enesin jamandaıdy» dep dirildeýi múmkin degen nanym-senim de bar.
Oǵan da den qoıǵan jón. Jalpy, meniń anam bylaı deıtin: «balam kúıeýińe jaqqyń kelse, tym tátti bolma, jutyp qoıady, tym ashy bolma, túkirip tastaıdy, dámdi bol» deıtin. Qulaq salatyn keńes.
