Eń qymbat zat

Ómirde otbasydan, jaqyn adamdardan mańyzdy nárse joq. Eń durys ýaqyt ınvestıtsııasy – ol bizdiń jaqyndarymyzben ótkizgen jaıma shýaq kúnderimiz. Alaıda, keı kezderi bul sózderdi aqylymyzben túsinsek te, is-áreketimizben kerisin jasaımyz. Ýaqyt bólýdi qajet etetin adamdarǵa kóńil aýdarmaımyz. Ol ata-anamyz, týǵan-týystarymyz, bala-shaǵamyz nemes dos-jarandarymyz bolýy múmkin. Bir sózben aıtqanda óz ýaqytymyzdyń «jemqoryna» aınalýdamyz, ıaǵnı ózimizge unaıtyn, biraq mańyzsyz dúnıelerge ýaqyt bólýdemiz. Ómirlik «kestemizdi» qaıta qarap, jaqyndarymyzǵa bóliný kerek bolǵan ýaqyttaryn solarǵa arnaý qajet.

Ókinishke oraı, bizde árqashan «ýaqyt joq» jáne de bizdi qorshaǵan ábigerlik  bizge oılanýǵa da mursha bermeıdi. Bizge bireý kelip eskertpeıinshe, sol baıaǵy qalyppen ómir súre beremiz. Biraq ýaqyt ótýde, al biz kesh qalmasaq bolǵany. Tómendegi qysqa ǵana áńgime barshamyzǵa bir serpilis berip, ómirlik qundylyqtarymyzdy qaıta qaraýǵa sebep bolady dep oılaımyn.

Talǵat bala kezindegi kórshisi Terekbaı atany kórmegenine uzaq jyldar ótken edi. Joǵary oqý orny, jumys, karera - ómir óz aǵysymen júrip jatty. Maqsatyna jetý jolynda kúni-túni aıanbaı ter tókti. Ómiriniń qıyndap ketkeni sonsha - ótkendi oılaýǵa shamasy kelmedi, tipti óz jubaıy men ulyna da ýaqyty qalmady.

Alaıda, ol óz bolashaǵynyń qamy úshin eńbektenýmen boldy jáne eshnárse oǵan kedergi bola almaıdy dep oılady. Kúnderdiń bir kúninde aýyldan anasy qońyraý shalyp, Terekbaı atanyń dúnıeden ótkenin habarlady. Janazasy osy aptanyń sársenbisinde ótpekshi eken.

Ol kórshi atany esine almaǵanyna birshama ýaqyt ótken edi. Tipti ony birneshe jyl buryn ómirden ótti dep oılap júrgen. Biraq anasynyń aıtýynsha, Terekbaı ata ony umytpaı, árýaqytta hál-jaǵdaıyn suraýmen bolypty. Ata kishkentaı Talǵattyń óziniń úıinde ótkizgen kúnderin jadynan shyǵarmaı, árdaıym anasyna aıtyp júrgen eken. Talǵattyń ákesi kóz jumǵan kúnnen bastap, Terekbaı ata balany qamqorlyǵyna alyp, óziniń bala-shaǵasy bolmasa da, ákelik jylýyn aıamady.

Talǵat ómirine qajetti talaı paıdaly dúnıelerdi osy kórshi atasynan úırengen edi. Tipti, aǵash kásibin sol kisiden ıgerip, sonyń arqasynda qazir jıhaz shyǵaratyn úlken holdıngtiń prezıdenti atanýda.

Ýaqytynyń tyǵyzdyǵyna qaramastan, Talǵat janazaǵa barýǵa sheshim qabyldady. Sársenbi kúni tań atysymen ushaqqa otyryp, tezdetip aýylyna jetti.

Sársenbi kúniniń besininde janaza namazy oqyldy. Imamnyń artynda on shaqty ǵana adam uıyp turdy. Sebebi, kórshi atanyń jaqyn týystary joq edi. Talǵat janaza namazy aıaqtalǵannan keıin, kórshi atasynyń úıine kirip shyǵýdy uıǵardy. Balalyq shaqtaǵy baldáýren kezderin, sýretti kitapty aqtarǵandaı, bir sát esine aldy. Kishkentaı kezinde qoly qalt etse boldy kórshi atanyń úıge júgiretin jáne keshke deıin aǵash jonyp, úıine jaıdarly kóńil kúıde qaıtatyn.

Úıdiń ishinde eshqandaı ózgeris joq, bári qaz qalpynda tur. Úıdiń árbir buryshy, árbir jıhazy Talǵatqa jyly kórindi. Talaı ret osy úıde atasymen tyǵylyspaq oınaǵany esinde.

Kenetten kózi bir ózgeristi baıqady. Ózine jaqsy tanys bir zatty taba almady. Ol – bir kishkene ǵana aǵashtan jasalǵan qorapsha edi. Kórshi ata ol qorapty kóziniń qarashyǵyndaı saqtaıtyn. Balalyq shaǵynda Talǵat bul qoraptyń ishinde ne bar ekendigin atasynan birneshe márte ret suraǵantuǵyn. Alaıda, Terekbaı atanyń jaýaby ózgermeıtin, árdaıym «Men úshin eń qymbat nárse» dep qana jaýap beretin. Endi mine, ol zat ornynda joq. Talǵattyń kóńili qulazydy, ol endi eshqashan sol bir qoraptyń qupııasyn bile almaıtyn ketetindigine nalydy.

Eki apta ótken soń Talǵattyń uıaly telefonyna Qazposhtadan habarlama keledi. Onda óziniń atyna arnaıy sálemdemeniń bar ekendigi jazylǵan edi. 

Kelesi kúni ertesimen kóligine otyryp, poshtaǵa jol tartty. Sálemdemeni ashylmaǵan kúıi kóliginiń artyna laqtyrdy da jumysyna qaraı bet aldy. Kabınetine kire sala sálemdemeni ústeldiń ústine qoıyp, kúndelikti jumysyna kiristi. Bir kezde ol  sálemdemeden tanys adamnyń jazýyn baıqady. Iá, ol jazý kórshi Terekbaı atanyń «Talǵat balama» degen jazýy edi. 

Talǵat sálemdemeni asyǵys ashyp, ishinen sol baıaǵy ózi izdegen qorap pen jazý jazylǵan jarty paraqty kózi shaldy. Paraqta «Men dúnıeden ótkennen keıin bul qorapty ulym Talǵatqa berýlerińdi ótinemin. Bunyń ishinde ómirimde maǵan eń qymbat zat saqtalǵan» dep qana jazylǵan edi. Talǵattyń kózine jas keldi. Dirildegen qolymen konverttiń ishinen kiltti alyp, aǵash qorapty ashty. Koraptyń ishinde qaqpaǵynda jazýy bar kishkene kelgen qalta saǵaty jatty. Ol kóz jasyna erik berdi. Onyń jylaýyna sebep bolǵan «Talǵat, ulym, maǵan arnaǵan árbir ýaqytyń úshin alǵysym sheksiz» degen bir ǵana sóılem edi.. 

Shynymen de, Terekbaı ata úshin ómirindegi eń qymbat nárse – balasymen ótkizgen ýaqyty. Talǵat qanshama jyl áke ornyna áke bola bilgen adamǵa bir ret te habarlaspaǵany úshin ózin jazǵyrýmen boldy. Jalǵan dúnıeniń jyltyraǵyna aldanyp, jaqyn adamyna ýaqytyn bóle almaǵandyǵy onyń janyn jegideı jedi. 

Birneshe mınýt qol saǵatty ustap turyp, sálden keıin hatshysy Zeınepti shaqyrdy da, barlyq kezdesýlerin keıinge qaldyrýdy surady. «Nege?» degen suraqqa jáı ǵana «Ulymmen ýaqyt ótkizý úshin» dep jaýap qatty. Kabınetinen shyǵyp bara jatyp «Zeınep, maǵan bólgen árbir ýaqytyń úshin rahmet» dedi. 

Bireý úshin eń qymbat syılyq – ol sizdiń ýaqytyńyz, sebebi siz eshqashan qaıtadan qaıtara almaıtyn nárseni syıǵa tartýdasyz. Jaqyn adamǵa degen mahabbatty bildirýdiń jaqsy tásili – oǵan kóńil bólý jáne arnaıy ýaqyt arnaý. Kúndelikti kúıbeń tirshilik qamymen keı kezde shynymen de mańyzdy nárselerge kóńil bólmeı, bolmashy dúnıelik zattarǵa qol jetkizý jolynda ómirimiz ótýde. Basymdyqtarymyzdy qaıta qaraıtyn jáne biz úshin eń qymbat nárseni anyqtaıtyn ýaqyt keldi dep oılaımyn.

Al, siz úshin dúnıedegi eń qymbat zat ne?...

Kópen Ádilet
QMDB Jastar isi sektorynyń meńgerýshisi