ER QADIRIN BILGEN ÁIEL

Bir jigit aýyl adamdarynyń maldaryn jınap, jaılaýda baǵady. Ol osy beınetimen otbasyn asyraıdy eken. Shopannyń aqyl-parasatty əıeli bar edi. Aýylda kimniń əıeline ashýy shyqsa, "Bar, shopannyń əıelinen ǵıbrat alyp kel"- deıdi eken.

Kúnderden bir kúni aýyl aǵasyn əıeli renjitip qoıady. Aýyl aǵasy əıeline:

- Eı, sózge túsinbeıtin əıel, bar da, shopannyń əıelinen az da bolsa aqyl úıren, odan úlgi al, kúıeýdiń qadirin biletin bol, - deıdi. Kúıeýiniń bul sózderinen əıeldiń tipti ashýy kelip:

- Shopannyń əıelinen neni úırenemin? Kúıeýi shopan bolsa, ózinde ne óner, ne qasıet bar deısiń,- dep mensinbeı sóıleıdi. Kúıeýi ashýlanyp jumysyna shyǵyp ketedi.

Əıel ol ketken soń shopannyń əıeli jaıynda oılanyp qalady. "Barlyǵy shopannyń əıelin maqtaıdy, onyń qandaı ereksheligi bar eken, erkekter únemi bizge ony úlgi qyla beretindeı? Ony bir kórip keleıinshi"- dep, shopannyń úıine qaraı bet alady.

Aýyl aǵasynyń əıeli esikten kirip kelgende shopannyń əıeli kúnde turyp ysyp ketken ydystan sý iship otyrǵan eken. Baıdyń əıeli:

- Sýdan maǵan da bershi, shóldep kettim,- deıdi.

- Bul sý ysyp ketken, sizge salqyn sý alyp kelemin, biraz kúte turyńyz,- deıdi shopannyń əıeli.

- Meıli... Biraq, sen óziń nege ysyp ketken sý iship otyrsyń?

- Hanym, osy ýaqytta kúıeýim kún ystyǵynda mal baǵyp júr. Kúnge qyzǵan mestegi sýdan sý iship júr. Kúıeýim ol jaqta jylymshy sý iship júrgende men bul jerde salqyn sý ishsem, əıeldigim qaıda qalady?!

Baıdyń əıeli bul əıeldiń shynynda da kórkem qulqy bar, erekshe qasıet ıesi ekenin moıyndap, tənti bolyp úıine qaıtqan eken.