Esek aqyrsa, dáret buzyla ma?

Baıaǵyda bir daýkes, báleqor adam qala ákimine kelip, meshit ımamynyń halyqty shatastyryp júrgenin aıtyp, shaǵym túsiripti.

«Meshit ımamy qandaı isimen, nendeı sózimen halyqty adastyryp jatyr?» – depti ımamdy jaqsy tanıtyn ákim tańǵalǵan kúıde. Álgi báleqor adam: «Oıbaı, ákim myrza, aıtpańyz, ımam meshit jamaǵatyn jıyp alyp, «Esek aqyrsa, kisiniń dáreti buzylady» dep, eshbir kitapta joq, Quranǵa qaıshy pátýa berdi. Senbeseńiz sol jerdegi jamaǵattan surańyz», – depti saspastan.

Ákim máseleniń anyq-qanyǵyn bilý úshin álgi meshit ımamyn quzyryna shaqyrtyp alyp: «Myna adam seni halyqty shatastyryp, «Esek aqyrsa, kisiniń dáreti buzylady» dep pátýa berdi deıdi. Osy aıtqanyń ras pa?» – deıdi.

Sonda ımam: «Olaı degenim ras, ári ol durys pátýa! Biraq myna kisi meshittegi dárisime keshigip keldi. Sosyn sózimdi aıaǵyna deıin tyńdamaı erte ketip qaldy. Sózimniń basyn da, aıaǵyn da tolyq tyńdamaı tek ortasyn ǵana shalys estigendikten qatelesip otyr. Men ol kezde dáretke qatysty bir máseleni halyqqa túsindirip jatqam.

Máseleniń bas-aıaǵy bylaı: «Bir kisi esegine dáret alatyn sýyn artyp, shól dalaǵa saparǵa shyǵady. Jol ortasynda álgi esegi dáret sýymen birge qashyp ketip, sý bolmaǵandyqtan namazyn táıammúm alyp oqıdy. Eger namazǵa turǵan kezde, eseginiń aqyrǵanyn estise, onda álgi kisiniń dáreti buzylady. Óıtkeni eseginiń aqyrǵany – qaıtyp aınalyp kelgendiginiń belgisi. Endeshe, sý tabylǵanda, táıammúmmen alynǵan dáret jaramsyz», – degen edim. Myna adam jamaǵat ortasynda únemi osylaı bále izdep júredi. Meniń sózimniń ortasyn ǵana qıyp alyp, sizge qısyq jetkizip otyr», – deıdi.

Imam sóziniń durys ekenine kózi jetken ákim álgi báleqor adamnyń ózine jaza qoldanypty.