«Ihsan – tárbıe negizi» kitaby jaıly zııalylar pikiri
Bas múftı Naýryzbaı qajy Taǵanulynyń jetekshiligimen QMDB ǵımaratynda ótken «Ihsan – tárbıe negizi» kitabynyń tusaýkeserinde jıynnyń qurmetti qonaqtary – el aǵalary qundy eńbektiń jaryq kórýimen quttyqtap, Dinı basqarmanyń ıgi bastamalaryna jyly lebiz bildirdi.
Myrzataı Joldasbekov (Memleket jáne qoǵam qaıratkeri):
«Búgin tusaýy kesilip otyrǵan «Ihsan – tárbıe negizi» kitabynyń elimizdiń Tuńǵysh Prezıdenti – Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasymen úndes, rýhtas ekenin kórdim. Keıingi jyldary Qazaqstan musylmandary dinı basqarmasynyń tikeleı atsalysýymen din men salt-dástúr sabaqtastyǵy týraly kókeıge qonatyn kitaptar kóptep shyǵyp jatyr. Bul óte quptarlyq, qýanarlyq jaǵdaı.
Dinı basqarmanyń negizgi mindetiniń biri – musylman tárbıesin berý. Osy rette aıtatynym, múftııat óz mindetin oıdaǵydaı atqaryp keledi. Onyń jarqyn mysalynyń biri – qolymyzǵa tıgen «Ihsan – tárbıe negizi» kitaby. Bul kitap adam balasyn tárbıeleýge, Hákim Abaı aıtqan «Tolyq adam» kontseptsııasyna negizdelgen».
Ulyqbek Esdáýlet (Qazaqstan Jazýshylar Odaǵynyń tóraǵasy):
«Din men ádebıettiń maqsaty – bir: urpaqty ulaǵatty iske tárbıeleý, adamzatty jaqsylyq pen izgilikke úndeý. Abaı kimde uıat bolsa, sol adamda ıman bolatynyn aıtyp ketken. Adamǵa qajet asyl qasıetterdi «Ihsan – rýhanı tárbıe negizi» kitabynan taptym. Bul eńbek óz oqyrmanyn jaqsy oılarǵa jeteleıdi. Óz basym bul kitapty erekshe qulshynyspen oqydym. Abaı adamzatty bes nárseden qashyq bolýǵa jáne bes nársege asyq bolýǵa shaqyrady. Mine, biz qashyq bolatyn jáne asyq bolatyn qundylyqtardy, ıaǵnı bes asyl is pen bes dushpandy osy kitaptan taptym. Bul eńbekti ar men namysymyzdyń kodeksi dep atar edim. «Ihsan – rýhanı tárbıe negizi» kitaby ulttyq ıdeologııamyzdyń negizi deýge bolady».
Darhan Qydyráli (Halyqaralyq Túrki akademııasynyń prezıdenti):
«Dinı basqarmanyń ıhsan taqyrybynda arnaıy kitap shyǵaryp, el aǵalaryn jıyp aýqymdy is-shara ótkizip otyrýy – úlken betburystyń basy dep oılaımyn. Ózderińizge málim, Túrkitildes memleketterdiń yntymaqtastyq keńesiniń beıresmı sammıtinde Túrkistan – túrki áleminiń rýhanı ortalyǵy bolyp bekitildi. Biz Túrkistandy rýhanı ortalyq deımiz. Nege? Sebebi Áziret Sultan Qoja Ahmet Iasaýı babamyz kúlli túrki áleminiń rýhanı ustyny retinde baǵalanady. Al rýhanııat degenimiz osy – ıhsan. Ihsannyń alyp besigi – Túrkistan topyraǵy. Júsip Has Hajıbtiń kisilik kitaby – «Qutty bilik» osy ıhsan kitaby. Berige tamyr tartsaq, Abaıdyń «Qarasózin» de ıhsan týraly kitap dep aıtýǵa bolady. Óıtkeni dúnıeniń kórinbegen tusyn túgendeý, álemniń túpki mánine yqylaspen, yjdaǵatpen tereńdep boılaý – ıhsan ilimi. Dinı basqarmanyń shyǵarǵan «Ihsan – rýhanı tárbıeniń negizi» kitaby qutty, ǵumyry uzaq bolsyn».
