IMAMDAR JUMYS ISTEMEIDI

16 qyrkúıek 2021 6404 0
Оqý rejımi

Iá, qate oqyǵan joqsyz. Rasynda da ımamdar jumys istemeıdi. Ásirese, men tanıtyn ımamdar. Nege ekenin aıtpas buryn, sál sheginis jasaıyn.

Saltanaty men sáýleti jarasqan meshit ishindegi tirshilik qumyrsqanyń ıleýindegideı qaınap jatady. Meshit ishindegi atmosferany túsiný úshin kózińizge 30 myń oryndyq «Astana Arena» stadıony men 5 myń kórermen emin-erkin sııatyn «Qazaqstan Kontsert» zalyn elestetińiz.

Stadıon men kontsert zaldar belgili ýaqyttarda ǵana tolsa, bes ýaqyt namaz ben jumaǵa jınalatyn jamaǵattyń kóptiginen meshitte ıne shanshar oryn qalmaı qalmaıdy.

Bul meshittiń qoǵamǵa qanshalyqty oń yqpal etetindigin ańǵartady. Birer jyl aldyn ata-babasyna duǵa baǵyshtaýǵa keletin jurt sany basym bolsa, búginde din úırenýge, dinı keńes alýǵa, atasynan qalǵan kóne kitaptardy teksertýge keletinderdiń qarasy kóbirek. Sonymen birge, saýat ashý kýrsyna qatysatyn shákirtter men ýaǵyz-nasıhat tyńdaýshylardyń sany men sapasy da edáýir ósti.

Mine, meshit ımamy – ýaǵyzshy, aǵartýshy, otbasylyq keńesshi-psıholog, kóne kitaptar boıynsha sarapshy jáne taǵysyn taǵy. Buǵan ǵalamtordaǵy saıt jáne áleýmettik jeli arqyly jarııalanatyn dinı tanymdyq maqalalar, suraq-jaýaptar, ártúrli taqyrypty qamtıtyn aýdıo-vıdeo ýaǵyzdardy qossaq, ımamdar bloger.

Fıqh negizi kitabynda bylaı deıdi«Hanafı ımamdary biraýyzdan: «Quran úıretken úshin aqy alýǵa ruqsat joq. Óıtkeni, Quran úıretý – basqa qulshylyqtar sııaqty amal. Al, qulshylyq úshin aqy alynbaıdy» degen. Bul úkim sol ımamdar zamanyna laıyq edi. Islamnyń áýelgi dáýirinde Quran muǵalimderine úkimet qazynasynan jalaqy taǵaıyndalatyn. Zaman ózgerip, muǵalimderge jalaqy berilmeıtin boldy. Quran muǵalimderi bala oqytýmen aınalyssa, otbasyn asyraı almaıdy, al eńbek etip nápaqasyn tapsa, Quran úıretý qyzmeti toqyraıdy. Osy sebepti, Quran úıretkenge aqy alýǵa tyıym úkiminiń kúshi joıyldy. Keıingi ǵalymdar Quran úıretý, ımamdyq jáne azan shaqyrý sııaqty qyzmet úshin aqy alýǵa ruqsat berdi».

1990-shy jyldary medresede oqyp júrgende ustazdarymyz «din jolyna túsken adam óziniń eńbegin jumys dep emes, qyzmet dep bilýi kerek» dep úıretetin. Aqıqatynda, Quranǵa qyzmet etýdi jumys dep aıtýǵa bolmaıdy. Qazaqta «Halyqqa qyzmet – Haqqa qyzmet» degen naqyl sóz bar.

Mine, sondyqtan men biletin ımamdar jumys istemeıdi, olar Quranǵa qyzmet etedi. Men tanymaıtyn ımamdar da solaı bolýy kerek.

Rýslan Qambarov

Pіkіrler Kіrý