MAL-MÚLIKTI BERETIN ALLA TAǴALA

Abbası halıfasy Mansur Ábý Bákir Syddyqtyń (r.a.) nemeresi Abdýrrahman ıbn Qasym ıbn Muhammed rahımátýllahı aleıhke:

“Maǵan tájirıbelerińizden nasıhat aıta otyryńyz” deıdi. Sonda ol bylaı degen:

“Omar ıbn Abdúlazız dúnıe salǵanda artynda on bir balasy jáne bar-joǵy on jeti dınar aqshasy qalǵan. Bes dınarǵa (altyn teńge) kebindendi, eki dınarǵa qabir ornyn satyp aldy, qalǵan aqshadan balalarynyń árbirine  on toǵyz dırhemnen (kúmis teńge) berildi.

Hısham ıbn Abdúlmálık qaıtys bolǵanda onyń artynda da on bir bala qalǵan, árbirine bir mıllıon dırhem mura qaldyrǵan.

Keıin men Omar ıbn Abdúlazızdiń keı balalarynyń kúnige júz atty ásker jasaqtap birge Alla jolynda jıhadqa shyqqandaryn kórdim.

Al Hısham ıbn Abdúlmálık balalarynyń qaıyr surap júrgenderin kórdim”.

Munyń tań qalatyn eshteńesi joq. Óıtkeni Omar ıbn Abdúlazız ár isinde Allanyń rızashylyǵyn oılap, balalaryn Rabbyna amanat etip aqyretke kóshti. Alla Taǵala da olardy aýqatty qyldy, qorǵady. Al Hısham bolsa, olarǵa dúnıelik qaldyryp jaǵdaılaryn jasadym dep oılady, alaıda munyń olarǵa paıdasy tımedi, joqshylyqta kún keshti. Iaǵnı tek dúnıeni oılaǵan adamnyń qolyndaǵy dúnıelik joq bolady. Al ár isinde aqyretti alǵa qoıǵan adamnyń nıetindegi qaıyr men bereket urpaqtaryna da juǵyp, olardyń da baqytyna sebep bolady.