MEIIRIMMEN TÚZELGEN TAǴDYR

Islam – meıirim men keshirim dini. Adamdy birden aıyptaýǵa emes, túzelýine sebepshi bolýǵa shaqyrady. Uly ǵalym, Imam Aǵzam Ábý Hanıfa (r.a.) ómirinen alynǵan myna bir oqıǵa – bizge úlken ǵıbrat. Imam Aǵzam Ábý Hanıfanyń (r.a.) jas bir kórshisi bolǵan eken. Ol ár tún saıyn mas kúıinde kelip, aıqaı-shý shyǵaryp, aınalasyna tynyshtyq bermeıdi eken. Soǵan qaramastan, ımam odan shaǵymdanbaı, sabyr saqtap, kórshisine tózimmen qaraǵan desedi.

 Bir kúni álgi jigitti túrmege qamaıdy. Kelesi túnde onyń daýsy estilmeı qalady. Imam Aǵzam tańyrqap, jaǵdaıyn suraıdy. Jigittiń túrmege túskenin estigende, erteńine túrmege ózi baryp, onyń bosatylýyn túrme bastyǵynan ótinedi. Bostandyqqa shyqqan jigit ımamnan qatty uıalady.

Sonda Ábý Hanıfa oǵan:

– Biz seni umytqan joqpyz, – dep, meıirimmen sóıleıdi. Osy kórgen jaqsylyǵy jigittiń júregin ózgertedi. Ol táýbege kelip, izgi jolǵa túsip, keıin ımamnyń shákirtteriniń biri bolady eken.

Bul oqıǵa bizge birneshe mańyzdy sabaq beredi:

 Birinshiden, adamdy kúnási úshin birjola úmitsiz dep sanaýǵa bolmaıdy. Ár júrek ózgerýi múmkin.

Ekinshiden, shynaıy nasıhat – qatal sózben emes, meıirim men kórkem minez arqyly jasalady.

Úshinshiden, musylman baýyrynyń qateligin kórgende, ony qoǵamnan ıtermeı, túzelýine kómektesý – úlken saýap.

Sahabalar men ǵulamalar eshkimdi birden aıyptamaıtyn. Olar adamdarǵa janashyrlyqpen qarap, týra jolǵa túsýine sebepshi bolýǵa tyrysatyn. Óıtkeni árbir adam – Allanyń quly, al júrekter – Allanyń qolynda.

 Endeshe, ózimiz de aınalamyzdaǵy adamdarǵa úkim shyǵarýǵa asyqpaı, meıirimmen qaraýdy úıreneıik. Múmkin, bizdiń bir jyly sózimiz bir jannyń taǵdyryn ózgerter. Alla Taǵala barshamyzǵa kórkem minez, keń júrek jáne týralyq násip etsin! Ámın.

Daıyndaǵan – Turar TÚGELULY