MIRJAQYP DÝLATULY BYLAI DEPTI...

MÁSJID MEDRESE HAQYNDA

Qazaq júr musylmandyq jalasynda,

Saırandap saharanyń dalasynda.

Faıda dep kúndiz, túni damyly joq

Ǵıbadat qylmaı haqqa shamasynda.

 

Degenmen «men musylman» is bitpeıdi,

Bul kúnde jurttyń kóbi din kútpeıdi.

Qazaqsha kıim kıip sóılegenmen,

Moınyńnan faryz ýájip bir túspeıdi.

 

Ortaǵa jarar edi meshit salsań,

Namazdy qaza qylmaı baryp tursań,

Bir ǵalym fazyl zattan ıman saılap,

Baılaryń járdem berip ýaqyf qylsań.

 

Daý dese umtylatyn sorly qazaq,

Din dese shalqaıatyn boldy qazaq.

«Mynaýyn, ótirik» dep betke túkir,

Joq bolsa bul sózimniń orny, qazaq.

 

Qazaqtyń kóp jerinde meshiti joq,

Joǵyna sebep bolǵan mıssıoner pop.

Ekinshi, halyqtyń ózi yqylassyz,

He ǵylyp ıslamǵa ashylsyn hod?

 

Bir adam hýfııattan ashsa mektep

Hakimge kórsetedi bireý qastap.

Kebiniń nıet-fıǵly jaman edi,

Áıteýir kele jatyr kudaı saqtap,

 

Kún boldy endi kóziń asharyńa

Baılaryń járdem berip nasharyńa.

Jasyń da jıhan kezip ǵylym izdep

Nadandyq qarmaǵynan qasharyńa.

 

Ońbassyń boıda júrse bul mineziń,

Teris pe nasıhatym bul bil óziń.

«Áıteýir ata-babam musylman» dep,

Dúrmekti qoıatuǵyn keldi keziń.

 

Tártipti medrese joq bul qazaqta,

Salady sábılerdi tek azapqa.

Moldekem shart júginip qahar etip,

Bosatar kún batqanda áreń shaqqa.

 

Bir bala ezý tartyp kúler bolsa,

Qytaısha dúre salar sol saǵatta,

Úsh-tórt jyl oqyp shyqqan bolsa mágár,

Sonda da ustarmaıdy jazar hatqa.

 

Bilmeıdi ýazıfasyn keıbir molda

«Elirip taqsyr» degen qur ataqqa.

Kim óledi, kim qoıady - tilegi sol

Kóbiniń baıqasańyz bul ýaqytta.

 

Táqdım, táfhın, táhrısdá jumysy joq,

Kúshteıdi álif-bı men ábjádqa.

Halyqqa qaıtip úlgi shasha alasyń,

Minezi hılaf bolsa sharıǵatqa?

 

Syıynyftap jylǵa bólgen námýná joq

húnerli bolsyn qaıdan bizdiń halyq.

Bu aıtqan barlyq ǵáıip mollalarda,

Háli emes isteýshide haqıqatta.

 

«Jylyna pálen somǵa jaldadym» dep,

Kúni-túni balalaryn oqytmaqta.

Otyrsa molda sordyń qoly bosap,

Bir iske eptep qana jumsamaqta.

 

Ǵylymdy ǵalymmenen hurmettemeı,

Álbette, munyń bári nadandyq ta.

Oryny bala oqytqan taza emes,

Dáris tyńdar qotyr buzaý, eshki, laq ta.

 

Keler me ózdiginen bizdi izdep,

Qol sozyp umtylmaımyz maǵrıfatqa

húnerli halyqtardan órnek alyp,

Kel endi, bul ǵadetti tastalyq ta!