MIRJAQYP DÝLATULY: Ia, ALLA!

Ia, Alla! Ǵalamyńdy jaratqanyń,
Júzine mahluqtardy taratqanyń,
Óndirip bir adamnan munsha halyq,
Álsizdi kúshtilerge qaratqanyń.

Mynaý jer, taý menen tas, anaý kógiń,
Ólsheýsiz, túpsiz shyńyraý darııa kóliń.
Mysqaly myń teńgelik asyl tastar,
Hástaǵa shıpa bolǵan jerde shóbiń.

Tamasha kóz jetkisiz toǵaılaryń,
Jarattyn bir sekýndta ońaı bárin.
Shadlyqpen dúnıeńnen oryn alyp,
Kókte qus, sýda balyq, toǵaıda ańyń.

Bulardyń biri kúshti, bireýi álsiz,
Kúni joq baǵzysynyń óter zarsyz.
Kóbine azý, tuıaq, tyrnaq syılap,
Qaldyrdyń taǵy kebin bir qarýsyz.

Sonda da panań kúshti, qudiretim,
Jylatpaý nasharlardy óz mindetiń.
Qashqan da, qýǵandaǵy barar saǵan,
Joqty bar, bar nárseni joq etetin.

Kelelik endi qaıtip adamzatqa,
Kóbisi bulardyń da raqatta.
Óligi ǵalamyńnan oryn alyp,
Bólingen neshe túrli mámlákatqa.

Tanýy jáne ózińdi birdeı emes:
hár dinde, qarap tursaq, hár mázhabda
Bir seniń barlyǵyńa shýbhá etkende,
Basqa isten qatalassa, ol ǵajap ba?

Han bolyp, halyqty bılep baǵyzylar,
Kórsetip ádilshilik mingen taqqa.
Qan tógip, baǵyzylar qaharly bop,
Aıamaı zulymshylyq etken halyqqa.

Ishinen din úırengen ǵalym shyǵyp,
Úndegen haq dep bilgen sharıǵatqa.
Úırenip dúnıe ǵylymyn danyshpandar,
Tyrysqan shaqyrýǵa jurtty jaryqqa.

Tabylyp arasynan jaýyzdar da,
Jol bógep nadandyqpen tartqan artqa.
Halyqqa janyn qıǵan qaharmandar
Kúzetken jurt paıdasyn hár ýaqytta.

Qaq jarǵan kara qyldy bıler shyǵyp,
Top jarǵan sheshender bar osy shaqta.
Nadandar esh nárseden habary joq,
Aqylsyz qaıýandardan az paryqta.

Baılar da dáýlet bitken eki túrli:
Biri sarań, bireýi jomarttyqta.
Moınyna dorba salyp júrgender kóp:

Qarny ash, kıimi joq tońyp sýyqqa.
Ómiri bireýlerdiń hıbste ótip,
Sarǵaıyp jaryq kórmeı tur ǵazapta.
Bárinen óner-bilim bosqa qalyp,
Ishinde osy kóptiń júr qazaq ta.

Mirjaqyp DÝLATULY