Olardyń júregi osylaı deıdi

01 qazan 2019 6417 0
Оqý rejımi

Balam, janym, kózimniń nury! Kúnderdiń bir kúninde men qartaıyp, ózimniń qımyl-áreketterime ıe bola almaıtyn halge jetemin. Sol kezde maǵan súıeý bolarnárse taıaq qana.Kúsh-qýatymnan aıyrylyp, qaýqarsyz qalǵan sol sátterimde maǵan kóńil bólip, meni túsiný úshin sabyrlylyqpen qaraýyńdy ótinemin.

Seni  kishkentaı kezińde kıimderińdi qalaı kııý kerektigin úıretken edim, qazir qoldarymnan kúsh ketip, jegeli otyrǵan tamaǵymdy ústime tógip alyp, bylǵanǵan kıimderimdi aýystyrýǵa ózdigimnen shamam kelmeıtin kúıge jettim. Buǵan da sabyr etip, meni túsin.

Ústimnen shyqqan jaǵymsyz ıister úshin meni jazǵyrma. Seniń kıimderiń men deneńniń  taza bolýy úshin jasaǵan áreketimdi esińe al.

Sanamnan aıyrylyp, aljı bastaǵan shaǵymda mıǵa qonymsyz áreketter jasasam, maǵan kúlýshi bolma, qaıta sen meniń sanam, kózim bol. Maǵan kómektes.

Maǵan neniń ne ekenin sen qalaısha úıretpeksiń? Seniń bul ómirde aq pen qarany aıyrýyń úshin jantalasyp, bar bilgenimdi saǵan úırenken men edim ǵoı...

Qarttyq óz degenin alady. Este saqtaý qabiletim kún sanap nasharlap bara jatqandyqtan, senimen sóılesip otyrǵan kezimde ne týraly aıtqaly jatqanymdy umytyp, kibirtikteýim múmkin. Sol kezderde ashýlanyp, meni tyńdaýdan qashýshy bolma. Ol kezderde seniń meniń qasymda bolýyńnyń ózi men úshin baqyt bolady. 

Aıaqtarymnan ál ketip, júre almaıtyn halge jetkende, meni qolymnan jetektep júrýge namystanba! Seniń myna jaryq dúnıede basqan ár qadamyńa rıza bolyp, kúni boıy qolymnan túsirmeı, jetekteýshi edim ǵoı... Erteń qolyńnan ustap, jetektep júretin sondaı  adamǵa zárý bolasyń.

Bilip qoı, men sen sııaqty bolashaq ómirge qadam basyp bara jatqan joqpyn, men ólimge jaqyndap, ólim kemesin jaǵada kútip otyrǵan adammyn. Sondyqtan, maǵan qarsy shyqpa, menimen birge bol.

Eger meniń qatelikterim esińe tússe, bilip júr, men saǵan tek jaqsylyq qana tileýshimin.

Meniń  qatelikterimdi keshirip, kemshilikterimdi jasyrǵanyń sııaqty, Allah ta seniń qatelikterińdi keshirip, kemshilikterińdi jasyrsyn, qulynym!

Seniń júzińdegi kúlki men qýanyshty kórý úshin talaı ret seniń qalaýyńdy jasap, sen jaryq dúnıe esigin ashqanda men seniń qasyńda boldym, endi sen, meniń osy dúnıemen qoshtasar kezimde qasymda bol!

Joǵaryda aıtylǵan sózderdi muqııat oqydyńyz ba? Onda bilińiz, barlyq analar qartaıǵan shaǵynda osyndaı kúıde, dál osyndaı sezimde bolady. Siz de ulyńyz ben qyzyńyzǵa oqytyńyz. Eshkim máńgi ómir súrmeıdi. Ana qadirin bilińiz.

Qasıetti Qurannyń «Isra» súresiniń 23-24 aıattarynda Alla Taǵala: «Rabbyń tek qana ózine quldyq jasaýdy, áke-shesheńizge jaqsy qaraýdy buıyrdy. Al eger olardyń biri nemese ekeýi de qoldaryńda turǵan kezde qartaısa, olarǵa «úh» dep te aıtpa. Sondaı-aq, olarǵa zekime jáne olarǵa sypaıy sóıle. Meıirimmen olarǵa qushaq jaıyp olarǵa bylaı dep duǵa jasa: «O, Rabbym! Olar meni kishkentaı kúnimde qalaı mápelep ósirgen bolsa, olardy solaı meıirimińe bóleı gór» de», - dep buıyrady. Osy ózi bir ǵana aıattyń ózi ata-ananyń biz úshin qandaı mańyzy bar ekenin kórsetip tur emes pe?! Ata-ananyń qadirin balaly bolǵanda bilersiń deıdi qazaq. Bul da bir danalyq. 

Sońǵy ret qashan anańyzdyń júzine meıirimmen qarap, ony kúldirdińiz? Qashan jaǵdaıyn  surap bardyńyz? Sońǵy ret qashan qushaǵyńyzǵa basyp, ony jaqsy kóretinińizdi aıttyńyz? Áke men ana bárimizde bireý ǵana. Olar qazynasyz qartqa aınalmasynshy...

Laýra Qanatqyzy

Pіkіrler Kіrý