ÓMIRDI BOSQA ÓTKIZBEÝ KEREK

Alla Taǵala bylaı deıdi: «Sol kúni árbir jan (dúnıede) jaqsylyq retinde ne istegen bolsa, sonyń bári aldynan shyǵady. Jaman isteri de dál solaı (men mundalap aldynan shyǵady). Sonda ol istegen jamandyqtary men óziniń arasynda jer men kóktiń arasyndaı qashyqtyq bolǵanyn qalaıdy. Alla senderdi Ózine qarsy kelip, asy bolýdan saqtandyrady. Alla quldaryna óte meıirban, sondaı janashyr». (Álı Imran súresi, 30 aıat)

Paıǵambarymyz (s.a.ý.) bylaı deıdi: «Alla Taǵalanyń qulynan teris aınalýynyń belgisi – quldyń paıdasyz istermen shuǵyldanýy».

Adam balasy ómiriniń qulshylyqsyz ótken ár sáti úshin ókinýi kerek. Óıtkeni Alla Taǵala adamdardy Ózine ǵıbadat etsin dep qana jaratqan. Alla taǵala Zarıat súresiniń 56-aıatynda: «Men adamdar men jyndardy tek qana Maǵan ǵıbadat etsin dep jarattym» deıdi.

Fıqh jáne hadıs ǵalymy, úlken sopylardyń biri Iýnýs ıbn Abdýlla (rah.) (1038 dúnıe salǵan) bir kúni múrıtterimen suhbat qurady. Sonsyn olarǵa qarap kúrsinedi.

 Múrıtteri:

«Ýa, sheıh! Bizge qarap nege olaı kúrsindińiz» - dep suraıdy.

 Sheıh:

 «Meniń de, senderdiń de ómirlerińnen bir saǵat kemidi. Soǵan kúrsindim. Osylaı saǵattar jyljyp, ómir óte shyǵady. Adam bir kúni artyna qarasa, ómiri taýsylǵan. Mine, sol kezde adam ǵıbadatsyz ótken ómirine ókinip opyq jeıdi» - dedi.