ÓZEKTI JANǴA ÓLIM HAQ
Bısmıllahır – rahmanır – rahım. Kúlli madaq bir Allaǵa laıyq. Alla Taǵalanyń salaýaty men sálemi Muhammed paıǵambarǵa, onyń áýleti men sahabalaryna bolsyn.
Jaratylǵan jannyń óleri haq. Máńgilik – bir Allaǵa tán. Alla Taǵala Quranda bylaı deıdi:
«Árbir jan ólimniń dámin tatady» («Álı Imran» súresi, 185 - aıat).
Ózekti janǵa ólim haq. Álemderdiń Jaratýshysy, barlyq nárseniń Iesi – Haq Taǵala osy pánı jalǵanda ómirmen qatar ólimdi de jaratty. Ómir men ólim adamdar úshin úlken synaq. Ol týraly Alla Taǵala bylaı deıdi:
«Ol qaısylaryńnyń amaly eń jaqsy ekendigin synaý úshin ólim men ómirdi jaratqan. Ol Ústem ári Keshirimdi» («Múlik» súresi, 2 aıat).
Demek,ólim men ómirdiń jaratylýyndaǵy syr jaratylys úshin úlken synaq jáne ýaqytsha berilgen merzim bolyp kelýinde. Ol synaqtyń máni – dúnıe tirshiliginiń qamshynyń sabyndaı qysqalyǵy, ólimniń kútpegen kezde kenetten kelý yqtımaldyǵy ári aıatta atalǵandaı sol mejeli merzimde izgi ister jasap, dúnıe tirshiliginde Allanyń ámirimen ıslam sharttaryna saı týra jolda júrý. Atalmysh aıatta ólimniń ómirden buryn aıtylýyn adam tirshiliginiń eń birinshi ólimnen, ıaǵnı joqtan bar bolýy arqyly bastalýmen baılanysty dep túsingen jón. Árbir jaratylǵannyń – kúlli tirshiliktiń bastalýymen aıatalýy haq.
Sondyqtan, «jazmyshtan ozmysh joq», qalaı bolǵanda da árbir jan ıesiniń ómir tirshiliginiń sońǵy núktesi – ólim. Ol – sózsiz bolatyn qubylys. Ajal kez kelgen ýaqytta keledi. Ol adamnyń qalaýyna taýeldi emes, Allanyń qalaýyna ǵana qatysty. Munyń adam balasynyń dármensiz jaratylys ekenine, barlyq bılik ıesi – Jaratýshy Haq Taǵala ekenine aıqyn dálel.
Ajalyn esten shyǵarmaı, sońy nemen aıaqtalatynyn ýaıymdap júrý, musylman sıpaty. Paıǵambaramyz (oǵan Allanyń salaýaty men sálemi bolsyn) bir hadısinde bilaı degen:
«Ýa, ıman keltirgender, bul dúnıede, saparyn jalǵastyrýshy, jolaýshy sııaqty bolyńyzdar».
Ólim, bir jaǵynan, ómirdiń aqyry bolsa, ekinshi jaǵynan, máńgilik ómirdiń bastaýy.
Qosylbaev Darhan Islambekuly
Astana qalasy «Qamqor-sharapat»
salttyq qyzmet ortalyǵy
«Tólebaı» meshitiniń naıb ımamy
