PATShAǴA QARSY ShYQQAN KISI
Bir soǵystan keıin halıfa Omar túsken oljany halyqqa teńdeı bólip berdi. Árkimniń oljasyna bir-bir jyrtys mata tıdi. Alaıda bul mata bir kıim tiktirýge kelmeıtin edi. Óziniń uly Abdýllah:
– Men ózimniń aqymdy sizge bereıin, siz ózińizge bir kóılek tiktirip alyńyz, – dedi.
Haziret Omar ulynyń bul usynysyn qabyl aldy. Birneshe kún ótken soń tigilgen kıimdi ústine kıip, halyqtyń aldyna sóz sóıleýge minberge shyqty:
– Ýa, múmınder! Meni tyńdap, maǵan moıynsunyńyzdar.
Osyny aıtýy muń eken, artqy sapta otyrǵan paqyr bir kisi turyp:
– O, múmınderdiń ámirshisi! Men saǵan baǵynbaımyn, – dedi.
Bul sózdi estigen halıfa birden irkilip:
– Nege? – dedi. Paqyr sebebin túsindirdi:
– Soǵystan túsken oljadan taratylǵan mata eshqaısymyzǵa kıim tiktirýge jetpedi. Alaıda sen ol matadan ózińe kóbirek alyp, kıim tiktirip alypsyń, – dedi.
Jaýabyn bere almaı qalarlyq qandaı is istep qoıdym eken dep oıy san–saqqa ketip qobaljyǵan haziret Omardyń muny estigen kezde kóńili ornyna tústi. Bolǵan jaıdy halyqqa túsindirý úshin jamaǵattyń ishindegi ulyn qasyna shaqyrdy. Balasy Abdýllah óziniń úlesin ákesine bergenin, ákesiniń sodan kıim tiktirgenin halyqqa aıtyp berdi.
Muny estigen halyq ta qatty qýandy. Sol kezde baǵanaǵy kisi turyp:
– Endi aıtaryńdy aıt, múmınderdiń ámirshisi. Endi saǵan baǵynamyn, – dedi.
Ádilettiń aq bereni Omar:
– Allahym, meni jasaǵan qatelerimdi eskertetin bir úmbetke halıfa etkeniń úshin saǵan sheksiz madaq aıtamyn, – dep qoldaryn kókke jaıyp duǵa etti.
El basqarǵan adamdardyń bári osyndaı bolsa ǵoı shirkin!
