PAIǴAMBARLARDYŃ DINDI HALYQQA TÚSINDIRÝI
قَالَ اللهُ تَعَالَى: لَا اِكْرَاهَ فِي الدِّينِ قَدْ تَبَيَّنَ الرُّشْدُ مِنَ الْغَيِّ فَمَنْ يَكْفُرْ بِالطَّاغُوتِ وَيُؤْمِنْ بِاللهِ فَقَدِ اسْتَمْسَكَ بِالْعُرْوَةِ الْوُثْقَى لَا انْفِصَامَ لَهَا وَاللهُ سَمِيعٌ عَلِيمٌ. (سورة البقرة،256
Alla Taǵala bylaı dedi (maǵynasy): «Dinde (haq dindi úgitteýde jáne qabyldaýda) zorlyq joq, (óıtkeni) týra jol men teris joldyń, aqıqat pen jalǵannyń ara jigi tolyq ajyrady. Budan bylaı kimde-kim taǵutty (jalǵan qudaılardy hám joq jerden din, júıe oılap taýyp, el-jurtty Soǵan úgitteýshi zulym kúshterdi) teriske shyǵaryp, bir Allaǵa ıman keltirse, onda onyń óte berik tutqany ustaǵany. Alla - Sámıǵ (aıtqan sózderińniń bárin estýshi), Alım (ishterińdegi nıet-pıǵyldaryńa deıin bárin tolyq biletin sheksiz ilim ıesi)». (Baqara súresi 256-aıat)
Islamda ıman sharttarynyń birinshisi – Allanyń barlyǵyna jáne birligine ıman keltirý. Islam diniń bul senimi Allanyń birligine, odan basqa syıynatyn eshbir táńirdiń joqtyǵyna sený degen sóz, al bul Quran kárimde jáne hadısterde “Lá ıláhá ıllallah” (Alladan basqa táńir joq) degen táýhıd sózi arqyly anyq aıtylǵan.
Búkil paıǵambarlar, atap aıtqanda, Idrıs (a.s.), Nuh (a.s.), Hýd (a.s.), Salıh (a.s.), Ibrahım (a.s.), Shuǵaıyp (a.s.), Musa (a.s.), İlııas (a.s.), Isa (a.s.) ózderi jiberilgen qaýymdy shırkten (Alla Taǵalaǵa ortaq qosýdan), putqa tabynýdan jáne jalǵyz Alla Taǵalaǵa ıman keltirip, ǵıbadat ettirý úshin bar kúsh-jigerlerin jumsaǵan. Tipten osy jolda jan bergender de bolǵan.
Jappaı kúpir men shırk jaılaǵan, dinı, ahlaqı, áleýmettik daǵdarys, búlikshilik qursaýyndaǵy kúpirshil, putqa tabynýshy álemmen jalǵyz alysý jáne nátıjege qol jetkizý mindeti bolsa, aqyr zaman paıǵambary Muhammed Mustafaǵa (s.a.ý.) berilgen.
Paıǵambarymyz (s.a.ý.) qaq ortadan jan-jaqqa taraıtyn tolqyn legindeı, Mekke múkárrámá men tóńireginen bastap, halyqty Alla Taǵalanyń týra jolyna, birinshi kezekte hıkmetke toly kórkem nasıhat arqyly shaqyrǵan. Shaqyrýyn qabyl alǵandardy jánnat nyǵmetterimen súıinshilegen, qabyl almaǵandardy jahannam azabymen qorqytqan. Fıtná men búlik joıylyp, Islam dini búkil jalǵan dinderden ústem bolǵansha; halyq Lá ıláhá ıllallah Muhammedún Rasýlýllah (Alladan basqa táńir joq! Muhammed (s.a.ý.) Allanyń Rasýly!) degenshe kúresý sekildi óte aýyr ári qurmetti mindetti atqarǵan.
