QARTTARYM, AMAN-SAÝ JÚRShI

Dúnıege keler bir ret,
Darııa-keýde taý músin.
Quryshtan quıǵan qudiret –
Qarttarym, aman-saýmysyń?!

Ózderiń bolsań janynda,
El ishi jomart, eńseli.
Dán ıisi júrgen qanynda,
Dalamnyń bir-bir bólshegi.

Arada jyldar jóńkilip,
Alystap kettim birtindep.
Aıta almaı aýyz toltyryp,
«Assalaýmaǵaleıkým!» dep.

Ózge bir mende joq tilek,
Ózderiń kózben baqqanym.
Jaıly jer izdep ketti dep,
Jazǵyra kórme, qarttarym.

Erdim bir sıqyr qalamǵa,
Shyǵardym belge jyr kóshin.
Bolǵam joq alań, dalamda,
Áýlıe qarttar júrgesin.

Jandy ǵoı baǵy dalanyń,
Senderge qýat, dem bersin.
Kıesi de onyń sendersiń,
Iesi de onyń sendersiń.

Aldynda júrshi kózimniń,
Asylym, altyn qazynam.
Aýyra qalsam ózińniń,
Peıilińmen-aq jazylam.

Saǵynyp talaı jyr týar,
Oralar áli-aq san jyrshy.
Dalamnyń ıisi burqyrap,
Qarttarym, aman-saý júrshi!

S. Jıenbaev