Qaryzdan qutqaratyn duǵa

Belgili sahaba Ábý Saıd ál-Hýdrı (r.a.) atalmysh duǵaǵa qatysty myna bir oqıǵany áńgimelegen:

Birde Paıǵambarymyz (s.ǵ.s.) namazdan tys ýaqytta meshitke kirgeninde, ansarlyq Ábý Úmámá atty bir kisiniń otyrǵanyn kórip: «Áı, Ábý Úmámá! Namazdan tys ýaqytta meshitte ne istep otyrsyń?» − dep suraıdy. Ol: «Ýa, Allanyń elshisi! Qaryzǵa belsheden batyp, qatty qınalyp otyrmyn», − dep jaýap berdi. Sonda Paıǵambarymyz (s.ǵ.s.) oǵan: «Saǵan oqyǵanyńda ýaıym-qaıǵyńdy seıiltip, qaryzdaryńnan Allanyń Ózi qutqaratyn bir duǵa úıreteıin be?» − degende, Ábý Úmámá (r.a.): «Álbette, ýa, Allanyń elshisi!», − deıdi. Sonda, Paıǵambarymyz (s.ǵ.s.) oǵan osy duǵany úıretip: «Bul duǵany tańerteń jáne keshke úzbeı oqyp turǵyn», − deıdi. Keıinnen Ábý Úmámá: «Men Paıǵambarymyzdyń (s.ǵ.s.) buıyrǵanyn buljytpaı oryndap júrdim. Sońynda Alla Taǵala meniń barlyq ýaıym-qaıǵymdy seıiltip, qaryzdarymnan da  tolyq qutyldym», − degen bolatyn.

Oqylýy: Allahýmmá ınnı á‘ýýzý bıká mınál-hámmı ýál-hazánı ýál-‘ajzı ýál-kásálı ýál-jýbnı ýál-býhlı ýá dal‘ıd-dáını ýá ǵalábátırrıjáálı.

Maǵynasy: Ýa, Allam, meni ýaıym jeýden, qaıǵy-qasiretten, dármensizdikten, jalqaýlyqtan,  qorqaqtyqtan, sarańdyqtan, qaryzǵa belsheden batýdan jáne adamdardyń zorlyq-zombylyǵynan saqtaı gór!