QURAN BAǴYShTAÝ
Alla Taǵalanyń qasıetti káláminiń jer betindegi tiri adamzatqa týra jol nusqaýlyq etip túsirilgeninde esh shúbá joq. Kúlli adamzat óz ómirinde oryn alǵan máselelerdi Quran jáne Súnnet arqyly, odan ári ǵalymdardyń túsindirýimen sheship otyrady. Alaıda osy Qurannyń bul dúnıeden ótkenderge paıdasy bar ma nemese baqılyqtarǵa ony baǵyshtaý durys pa degen suraqtar tóńireginde birneshe alaýyzdyqtar týyndaǵan. Áhlý Súnnet ǵalymdarynyń kózqarasy boıynsha biraýyzdan quran baǵyshtaý, saýaby joldanǵan adamǵa jetetin, quptarlyq is. Bul saýalǵa baılanysty sharıǵatymyzda dálelder qatary az emes. Dálel-dáıekpen sózimizdi aıqyndaıtyn bolsaq:
Maǵqal ıbn Iasardan jetken hadıste Paıǵambarymyz: «Ólilerińe Iasın súresin oqyńdar»- degen.
Ahmad ıbn Hanbal atty ataqty mýhaddıs ǵalym shákirtterine sabaq ótip jatqan kezinde, ol bir kisiniń qabir basynda turyp Iasın súresin oqyp jatqanyn kóredi. Imam Ahmad muny kórip, óziniń shákirtteriniń birine bylaı deıdi: Ana kisige baryp aıt, olaı jasamasyn, bul bıdǵat amal. Shákirti ımamnyń aıtqanyn qabir basyndaǵy kisige jetkizedi. Sol kezde ımam Ahmadtyń basqa bir shákirti oǵan: «Men Paıǵambardyń (s.ǵ.s) – Ólilerińe Iasın súresin oqyńdar, – dep aıtqan hadısin estidim»- dedi. Muny estigen ımam – Astaǵfırýllah, ýa atýbý ılaıhı (Alladan keshirim surap, oǵan táýbe ettim), deıdi de, alǵash jumsaǵan shákirtine taǵy da: oǵan baryp aıt, Iasın súresin oqı bersin- degen.
Mine, osy máseleni ıbn Qýdama óziniń «Mýǵnı» atty asa úlken kitabynda keltirgen. Sondaı-aq basqa da hadısterde de Medıne halqynyń qabir basynda Álı Imran súresin oqyǵandyǵy keltiriledi.
Joǵaryda keltirilgen dálel jalǵyz emes, osy maǵynalas hadısterdiń qatary kóp. Osy oraıda aıtyla ketetin másele, quran baǵyshtaýshy adamnyń qurandy shynaıy nıetpen, saýabyn Alladan úmit etip oqýyna baılanysty. Arnaıy kisi jaldap aqysyna quran baǵyshtatý sharıǵatymyzda quptalynbaıdy. Sol sebepten Quran Kárimdi túpnusqasynan oqý ár musylmanǵa mindet bolmaq. Alla jaqsyraq bilýshi!
Astana qalasy,
«Qamqor-sharapat»
salttyq qyzmet ortalyǵy,
«Yryskeldi qajy» meshitiniń
Naıb ımamy Ábýtalıb Jasulan
