QURBAN NISAB MÓLShERI JÁNE ÝÁJIP BOLÝYNYŃ ShARTTARY
![](/img/articles/cca12c7c3ecc5396a8a9fac69471df29.jpg)
Qurban nısab mólsheri: negizgi, basty qajettilikterinen tys pitirge ýájip bolatyndaı mal-múlki bar, erkin jáne óz úıindegi (jolaýshy emes) erkek, áıel bar musylmanǵa qurban shalý ýájip.
Bul mal-múliktiń zeket nısabyndaǵy sekildi kóbeıetin dúnıe bolýy jáne arada bir jyl ýaqyt ótýi shart emes.
Negizgi, basty qajettilikter mynalar: úı, úıdegi jetkilikti kerek-jaraq, buıym, kólik, úsh qabat kıimi ıaǵnı, jumys kıim, kúndelikti kıetin kıim, mereke, t.b. kıetin kıim, óziniń jáne qolyna qaraǵan jandardyń bir aılyq nápaqasy. Odan artyq 80,18 gr. altyn nemese quny soǵan bara-bar nársesi bar adamnyń pitir sadaqa berip, qurban aıtynda qurbandyq shalýy ýájip.
Qurban shalýǵa arnalǵan kúnderdiń (aıttyń 1-shi, 2-shi jáne 3-shi kúninde, Shafıǵı mázhabynda 4-shi kúni de) aqsham mezgiline deıin aýqatty, ıaǵnı nısabqa ıe adamǵa qurban shalýy ýájip bolady.
* Erkin, óz úıindegi (jolaýshy emes) jáne nısabqa ıe musylman balasynyń kishkentaı bala úshin qurban shalýy mústáhap. Zahırýr-rıýaıáda solaı, pátýa soǵan saı.
Imam Hasan ıbn Zııadtyń Imam Aǵzamnan rıýaıat etýi boıynsha, nısapqa ıe adamnyń kishkentaı balasy úshin jáne qaıtys bolǵan ulynyń balalary úshin qurban shalýy ýájip. Imam Qýdýrı Imam Hasannyń osy rıýaıatyn durys kórgen.
* Imam Aǵzam men Imam Ábý Iýsýf patýasy boıynsha, qurban shalýǵa mindetti bolý úshin aqyldy, balıǵatqa tolǵan bolýy shart emes. Esi durys emes adam men kámeletke jetpegen balanyń mal-múlkinen ákesi ne bolmasa qamqorshysy qurban shalyp, tarata alady. Taratqanynan artylǵanyn ózderi (kıim-keshek tárizdi) qajetine jaratatyn bir zatpen aýystyrsa bolady. Alaıda, Imam Muhammedtiń pátýasy boaıynsha qurban shalýǵa mindetti bolý úshin adamnyń esi durys jáne balıǵatqa jetken bolýy shart.