Ramazan aıyna daıyndyq qandaı bolýy kerek?

21 sáýіr 2020 7194 0
Оqý rejımi

Ramazan aýyz bekitken jamaǵatqa dinimizde sabyrdyń orny úlken ekenin eske túsiretindeı. Ǵalymdar sabyrdyń úsh jaǵdaıda adamǵa óte qajet ekenin bildirgen. Olar – kúná istemeýge, taǵdyrdyń qıyndyqtaryna jáne qulshylyq jasaýǵa degen sabyr men shydamdylyq. Rasynda orazada adamnyń sabyry men tózimdiligi synǵa túsedi. Hadısterge júginsek, «Sabyrdyń dindegi orny – denedegi bastyń ornyndaı». Sondyqtan, taqýa musylmandar aqyrettegi ystyq otty eske ala shoshynyp, bul dúnıedegi kúnniń ystyǵyna meılinshe razy kóńilmen tózimdilik tanytyp, qulshylyqtaryn jalǵastyrǵan. Onyń ústine qıyndyǵyna tózgen saıyn beriletin saýaptyń da arta túsetini taǵy bar.

Jalpy Ramazan aıyna degen daıyndyǵyn musylmandar erejep aıynda-aq bastap ketedi. Óıtkeni, erejep shaǵbandy, al shaǵban Ramazandy súıinshileıdi. Áýelgi eki qasıetti aı Ramazan aıyna degen rýhanı daıyndyqty pysyqtaý turǵysynan asa mańyzdy. Erejepte tilimizdi beıpil sózder men ǵaıbattan, ósek pen ótirikten tyıyp, zikir men tásbıh aıtýǵa den qoıa bastaımyz. Qarap júrip tilimizden kúná taýyp almaýǵa tyrysamyz. Eshkimmen janjaldaspaýǵa, ár-kez aýyz bekitýge daǵdylana bastaımyz. Paryz namazdardy nápil ǵıbadattarmen tolyqtyramyz. Saýapty isterimiz ben sadaqalarymyzdy kóbeıtemiz. Rýhanı azyǵymyzdy qamdap, dinı tálimimizdi molaıtyp, Qasıetti aılardy óz deńgeıine saı qadirleýge bar yntamyzdy salamyz. Erejep, shaǵban aılaryn jaqsy kútken musylman Ramazan aıyn tolyq daıyndyqpen qarsy alady. Orazaǵa ádettengendikten endigi jerde orazany kemel ustaýǵa janyn salady. Dene múshelerin de jamandyqtardan tyıyp úırenip qalǵandyqtan, olardy da qadaǵalaýyn kúsheıtedi. Nápsisin tyıyp, oıyn taza ustaýǵa ádettengendikten sol jaqsy ádetin jalǵastyrady. Mıǵraj, Baraǵat sekildi qasıetti túnderdi kútkendikten, Qadir túnin tolyqtaı izgilikte ótkizedi. Týys-týǵandaryna qaraılasyp, ata-anasynyń razylyǵyn alýǵa peıil tanytady. Moınynda kisi aqysy bar-joǵyna mán beredi. Kórshi-qolań, alys-jaqyn aǵaıyndaryna, tanystaryna osy aılardyń qasıetti sharapatyn sezdirýge tyrysady. Jurtqa kóbirek jaqsylyq jasap, dinı bilimin kemeldendirýge den qoıady. Byltyrǵy Ramazanǵa qaraǵanda bıylǵy Ramazanda Allaǵa anaǵurlym jaqyndaı túsýge, ardaqty Muhammed Paıǵambarymyzdy (s.ǵ.s.) anaǵurlym jaqynnan tanı túsýge peıil tanytady. Súre-duǵa jattap, tanymyn molaıtady. Osylardyń barlyǵy da qasıetti aılarda úlken saýapqa batyratyn ister. Alla ózine jaqyndaı túsken qulyn jaqsy kóredi. Bir quly táýbege kelgende qatty qýanady. Múminniń jaqsy nıetine de saýap jazady. Sondyqtan bundaı múmkindikti sátti paıdalana bilý kerek. Ramazan aıy, Qadir túni – Allanyń quldaryna degen meıirimi. Quran da osy aıda túskendikten, Qurandy kóp oqyp, túsinýge yqylas tanytqan jón.

Jaratýshy Iemizdiń raqym qazynasy sheksiz. Sol sebepti «Menen ǵana tileńder» deıdi. Jomarttyǵy da sheksiz. Sondyqtan aýyz bekitýshige saýapty da molynan bermek. Qulshylyqqa berilgen, saýap-qumar súıikti quldaryna aqyrette Jánnatty násip etip, kórkemdigin kórsetýge ýáde beredi. Sondyqtan, eki dúnıeniń de baqytyn kózdegen jandar Ramazan aıyna degen rýhanı daıyndyǵyn kún sanap pysyqtaı bergeni jón.

Pіkіrler Kіrý