Sáresi jaıly birer sóz

30 mamyr 2018 1279 0
Оqý rejımi

Adamzattyń asyl ustazy Muhammed Paıǵambarymyzdyń (s.ǵ.s.) qasynda uzaq bolǵan sahabalardyń biri Ánas ıbn Malık (r.a.): «Sáresi ishińder, óıtkeni sáreside bereket bar[1]», – degen hadıs rıýaıat etedi. Jalpy, qasıetti Ramazan aıy amal men saýaptyń esebi eselep artatyn bereketti aı. Sonyń ishinde, paıǵambarymyz (s.ǵ.s.) aıtyp ketkendeı, sáresi bereketiniń de orny erekshe.

Sáresiniń birinshi bereketi – súnnetti oryndaýymyzda jatyr, ıaǵnı paıǵambarymyzdyń (s.ǵ.s.) únemi jasaǵan amalyn oryndaǵan bolamyz. Zaıd bın Sabıt (r.a.): «Biz Alla elshisimen (s.ǵ.s.) birge sáresin ishtik, sosyn namazǵa turdyq», – dedi. Sonda odan: «Azan men sáresi arasy qansha bolǵan edi?» – dep suraǵanda sahaba: «Elý aıat shamasynsha[2]», – dep jaýap bergen edi.

Paıǵambar (s.ǵ.s.) sáresi ishpeı oraza tutqan bolsa, musylman úmbetine nár tatpaı oraza bekitý qıynǵa soǵar edi. Al, sáresini tún ortasynda ishse, bul da ońaı bolmas edi. 

  Paıǵambarymyz (s.ǵ.s.) bul qulshylyqqa erekshe mán berip, sahabalardy da úndep qyzyqtyrýshy edi. Ýaqyt ýaqytymen sáresiniń bereketi men artyqshylyǵyn esterine salyp otyratyn edi. Bul týrasynda ırbad bın Sarııa (r.a.) Alla elshisiniń (s.ǵ.s.)  ramazan aıynda sáresige shaqyryp, «Kel, qutty asqa[3]» degenin rıýaıat etedi.

Ábý Saǵıd ál-Hýdrı (r.a.): «Sáresi – bereket, ony tastaýshy bolmańdar. Tym bolmasa bir jutym sý ishseńder de[4]», – degen.

Ekinshi bereketi: Sáresi musylmandardy osy qutty dastarqan buıyrmaǵan kitap ıeleriniń orazasynan erekshe etip turady. Amr bın As (r.a.): «Bizdiń oraza men kitap ıeleriniń orazasynyń aıyrmashylyǵy sáresi ishýde[5]», – degen hadıs jetkizgen.

Úshinshi bereketi: Sáresi adamǵa ǵıbadat etýge kúsh jáne kúndelikti isine sergektik beredi. Sáresi ishpegen adam boıy álsirep kúsh-qýatyn joǵaltady. Tipti, aýzyn ashyp jiberýge májbúr bolýy da múmkin.

Tórtinshi bereketi: Sáresi ishýshi duǵa-tilek qabyl bolatyn ýaqytta oıaý bolady. Óıtkeni, hadıste ár kúni sáresi ýaqytynda Alla taǵala: «suraýshy bar ma, beriledi, duǵa etýshi bar ma, jaýap qaıtarylady, ıstıǵfar etýshi bar ma kúnási keshiriledi[6]»,-dep aıtady,-delingen.

Besinshi bereket: Sáresi ishý – ıláhı meıirimdilikti kórinisi. Alla taǵala qalasa, eshbir tamaq jemeı oraza tutýdy ámir etken bolar edi. Alaıda, Alla taǵala barlyq ámirlerinde jeńildik pen meıirimdilik kórinis tapqan.

Altynshy bereket: Sáresi ishken adamǵa Alla taǵalanyń raqymy jáne perishtelerden duǵa jaýady. Ábý Saǵıd ál-Hýdrı (r.a.) rıýaıat etken hadıste: «Rasynda Alla taǵala jáne perishteleri sáresi ishýshilerge raqymet pen duǵa etedi[7]»,-delingen.

Sóz sońynda, sáresi dastarqany jaıly birer jaıt. Paıǵambarymyz (s.ǵ.s.): «Musylmannyń sáresi asy qurma netken tamasha as[8]»,-degen.

 


[1] Buharı, Mýslım
[2] Buharı
[3] Ábý Daýd, Nasaı
[4] Ahmed
[5] Mýslım
[6] Mýslım
[7] Ahmed
[8] Ábý Daýd

Pіkіrler Kіrý