SÚIGEN ADAM SEZIMI ÚShIN BAQYTTY

Adam balasynyń sanasyna salmaq, sezimine serippe bolǵan Jaratqannyń jumbaǵyna taǵy bir úńilip kóreıikshi.

Tulaboı órtenip-janyp, aqyl-esten tanyp, kózdegi perde julynǵandaı, ómirge qaıta kelgendeı bolǵan, bireýimiz úshin asyq, bireýler úshin qashyq qalǵan qaıran ǵashyq kúnder-aı! Qudiretin qupııalaý baıqatqan Jaratqannyń sheberi-aı!..

Meniń oıymsha, ǵashyq bolý – Mahabbattyń alǵashqy baspaldaǵy, ıaǵnı ǵashyqtyq – shaqyrý, mahabbat – sanaly áreket, jemisti eńbek. Ǵashyqtyq – Adamnyń tereńin túısiný, ózgeler kóre almaıtyn ózegin seziný; al mahabbat – Adamnyń dárejesin baǵamdap, Kemeńgerdiń qudiretine bas ıgen alǵys sezimi. Sondyqtan, ǵashyq bolý – Adam bolýdyń, ómirdi gúlge oraýdyń ǵajaıyp múmkindigi...

Ǵashyqtyq – ózińdi, ómirdi jańa bir qyrynan tanyp, Jaryqqa umtylǵan jarqyn qadam bolýy da nemese jarǵa jeteleıtin jańsaq qadam, jalǵan Jolǵa aınalýy da múmkin syndy kezeń. Sebebi: ǵashyqtyq – Qudirettiń beleń alýy, qasıettiń oıanýy, Aqıqatqa qaraı bir adym alǵa basý bolǵandyqtan, shamasy kelse, eki adym artqa tartatyn azǵyrýshy Ázázildiń iske qosylatyn, jynystyq jetilýdiń áserinen jan qalaýymen qatar tán qalaýynyń kúsheıýi, Nápsiniń óz kúshine minýimen sáıkes keletin kezeń. Iaǵnı kúrestiń – Jaqsylyq pen Jamandyq, Perishte men Saıtan arasyndaǵy bitispes shaıqastyń bastalǵan ýaqyty...

Mahabbat – bergendi, bóliskendi, qýanysh pen baqyt syılaýdy, esepsiz, rııasyz aralasýdy qalaıtyn patsha sezim. Ol – eseıgen, tolysqan, sanaly jannyń jemisi. Óıtkeni sana-sezim ósken saıyn súıe bilý qasıeti artady, al súıip úırengen saıyn sana-sezim de sáýlelene bermek. Iá, shyn súıgender boıynan senimniń sáýlesi tógilip turady...

Shyn súıgen adam – ózimshildiktiń qursaýynan qutylyp, basqa kúıdi – Birlikti sezinedi. Eki adamnyń birin-biri ólerdeı «súıip», al basqalardy «bóten» sanaýy nemese dushpanǵa balaýy – shyn súıý emes, adasý, eki jetim kóńildiń qarańǵy qapasy; tipti temir torlary altynnan bolsa da...

Shyn súıgen adam súıgenine qosylsa da, qosylmasa da – baqytty: ol súıgenine tek bar bolǵany úshin, kezdeskeni úshin, Ómirdi súıýdi úıretkeni úshin, tipti tátti bir muń syılaǵany úshin rıza, alǵystan basqa aıtary joq!..

Shyn mahabbat aq júrekti adamnan shyǵady. Alǵashqy mahabbattyń ómir boıy umytylmaıtyny, ańsatatyny, áseri – taza júrektiń, kirlenbegen kóńildiń shýaǵynan. Keıin dál sondaı súıe almasaq: júrektiń qaraıýynyń, sananyń kúńgirttenip, senimniń azaıýynyń kórinisi dep baǵalaǵaısyz...

Óz jan-dúnıemizde úılesim ornamaı, ózimizdi ózimiz Adam retinde túsinip, jetildirip, súımeı turyp, «ózgeni súıe alam» deý – qatelik. Óz qasıetimizdi – Mahabbatymyzdy iske qospaı, basqa bireýden sezim kútý – jetimdik. Súıip úırenbeı – jan jylýyn syılap úırenbeı, baqyt syılap úırenbeı turyp, «baqytsyzbyn» deý – dármensizdik, al «mahabbat joq» deý – aqymaqtyq!..

Mahabbat máni – súıip úırený, Ómir taný, sol arqyly Jaratýshynyń keremetin moıyndaý; Oǵan súıispenshilikpen jaqyndaý, tabyný, tabysý...

Alǵadaı ÁBILǴAZYULY