Jaqsy kúıeý qandaı bolýy kerek?

Shańyraqtyń shattyǵy men berekesi áıeldiń qolynda deımiz. Durys-aq. Alaıda sol áıeldi áıel etetin, qamqorshysy ári qoldaýshysy, ómirlik serigi, jubaıy emes pe? Otbasynda áıelmen qatar er adamǵa da júktelgen mindetter az emes. Kez kelgen er jigit jaqsy jar, otaǵasy, ardaqty áke, elge syıly azamat bolǵysy keledi emes pe? Ol úshin ne isteý kerek?

1. Otbasyn materıaldyq turǵydan qamtamasyz etý tolyqtaı er adamnyń moınynda.

2. Paıǵambarymyz (s.ǵ.s.) bir hadısinde: «Senderdiń eń jaqsylaryń – jubaılaryńa jaqsy qaraıtyndaryń» – degen. Sondyqtan áıelińiz ben balalaryńyzǵa meılinshe meıirimdi, jumsaq bolyńyz.

3. «Men bul úıdiń otaǵasymyn, meniń degenim bolady» degen dórekilik pen menmendikke jol bermeńiz. Er adamǵa, ákege tán qataldyq, árıne, kerek, biraq óz ornymen, jónimen bolýy tıis.

4. Janyńyzdaǵy jubaıyńyz ben balalaryńyzdy násip etken Allaǵa shúkirshilik etińiz. Áıelińizge rızashylyǵyńyzdy bildirip turyńyz. Sebebi, áıel kirińizdi jýyp, tamaǵyńyzdy daıyndap, urpaǵyńyzdy jalǵap, janyńyz ben tánińizdiń tynyshtyǵyn qamtamasyz etedi emes pe?

5. Dinimizde áıel adamǵa daýys kóterip, aýyr sózder aıtyp qorlaýǵa, qol kóterýge tyıym salynǵan, kúná bolyp sanalady.

6. Jumystan qansha sharshap kelseńiz de áıelińiz ben balalaryńyzǵa kóńil bólýge tyrysyńyz. Olarmen sóılesińiz, keregin surap, qandaı máseleler bar ekenin surap turyńyz. Olardyń tárbıesin umyt qaldyrmańyz.

7. Minsiz adam bolmaıdy. Eger jaryńyzdyń sizge unamsyz jaqtary, is-áreketteri bolsa, bir qatelik jasap qoısa jaı sózben aıtyp, túsindirýge tyrysyńyz. «Seniń myna jeriń durys emes sııaqty. Osyndaı bolǵanyńdy qalar edim» degen sııaqty.

8. Keshirimdi bolyńyz.

9. Túsinistik pen syılastyq – baqytty otbasy bolýǵa aparatyn jol.

10. Áıelińizge syrlas dos bola bilińiz. Qınalǵan sátterinde demeý bolyp, aýyryp qalsa janynan tabylyp, qamqorlyq tanytyńyz. Sebebi áıel – Allanyń er adamǵa bergen amanaty.

11. Jaryńyzdyń týystaryn syılańyz, olarmen jaqsy qarym-qatynasta bolyńyz.