30 kompanııaǵa halal sertıfıkaty berildi
Jyl basynan beri QMDB-ǵa qarasty «Halal Damý» JShS barlyǵy 30 kompanııany sertıfıkattap, 7 kompanııanyń qyzmetin toqtatty. Qazirgi tańda barlyǵy 282 kompanııa «Halal Damý» JShS-niń baqylaýynda.
Óńirlik ókilderdiń aımaqtarda júrgizgen oqý-semınary nátejıesinde 17 qasapshy sharıǵat ári halal standartqa sáıkes mal soıý talaptaryn úırenip, «QMDB halal qasapshysy» kýáligi men sertıfıkatyna, jeke mórge ıe boldy.
Sońǵy úsh aıda «Ulttyq Ekspertıza ortalyǵynyń» 14 óńirlik jáne eki qalalyq mekemesinen, «Treegene» molekýla-genetıkalyq zerthanasynan barlyǵy 29 ónim laboratorııalyq tekseristen ótti.
Ár aıdyń sońynda óńirlik jaýapty baqylaýshy-ınspektorlardyń qatysýymen «aılyq tekseris jumystary» júrgizilip, tekseris nátejıeleri «Halal Damý» JShS-na tıesili áleýmettik jelilerde tutynýshylar nazaryna usynylyp otyrdy.
«QMDB halal» logotıpin zańsyz paıdalanǵan 5 mekemege qatań eskertý sharalary qoldanyldy.
Sonymen qatar, Monǵolııa musylmandary dinı basqarmasynyń Bas múftıi Batyrbek Hadys myrzanyń qatysýymen «Halal Damý» JShS arasynda «Ózara yntymaqtastyq týraly memorandýmǵa» qol qoıyldy.
Jyl basynda musylmandardyń qara shańyraǵy QMDB-nyń bas ǵımaratynda «Halal Damý» JShS-nyń shtattyq qyzmetkerleriniń jáne óńirlik ókilderiniń qatysýmen jyldyq qorytyndy jıyn ótti. Úzdik qyzmetkerler QMDB tóraǵasy, Bas múftı Serikbaı qajy Orazdyń arnaıy alǵys hatyna ıe boldy.
Halyqtyń «halal jáne haram» jóninde saýatyn arttyrý maqsatynda elimizdegi túrli buqaralyq aqparat quraldary men áleýmettik jelilerde úgit-nasıhat jumystary júrgizilip, tanymdyq-nasıhat sharalary belsendi túrde oryndalyp jatyr.
