Abaıdyń 175 jyldyǵyna oraı qaıyrymdylyq semınar-trenıngi bolyp ótti (FOTO-VIDEO)
Búgin respýblıkalyq «Áziret Sultan» meshitinde hakim Abaıdyń 175 jyldyǵyna oraı «Talap, eńbek, tereń oı, qanaǵat, rahym oılap qoı!» atty qaıyrymdylyq semınar-trenıngi bolyp ótti. Ǵıbratqa toly basqosýǵa 50-ge tarta áleýmettik jaǵdaıy tómen otbasylar qatysty.
«Balyq berme, qarmaq ber!» támsili aıasynda júzege asqan sharaǵa QMDB Nur-Sultan qalasy ókildiginiń «Rýhanı jastar» qanaty jáne «Áziret Sultan» meshitiniń «Inabat» qyz-kelinshekter klýby muryndyq bolyp otyr.
Shara shymyldyǵyn ashqan «Áziret Sultan» meshitiniń naıb ımamy Erbolat Jýsýpov QMDB tóraǵasynyń birinshi orynbasary, naıb múftı Naýryzbaı qajy Taǵanulynyń jyly lebizin jetkize otyryp, jınalǵan qaýymǵa eńbek etýdiń sharıǵatymyzdaǵy orny men mán-mańyzyna toqtalyp ótti.
Al, «Tolyq adam» bolýdyń 4 joly – Abaıdyń sózderin aǵylshynsha úıretetin ádistemeniń avtory, «Qazaq English» ortalyǵynyń dırektory Ernat Melsuly til bilý álemniń kilti ekendigin erekshe atap, kelip otyrǵan jamaǵatqa aǵylshyn tilin tegin úıretetindigin jetkizdi.
Sondaı-aq, kásipker Baljan Medetova jınalǵan áıel jurtshylyǵyna motıvatsııalyq turǵydan jiger berip, demeý sózderin aıtty. Biraz jyldan beri tátti ónimderdi jasaýmen aınalysyp kele jatqan maman kelýshilerge tegin sheberlik synybyn ótkizetindigin atap ótti.
Shara sońynda áleýmettik jaǵdaıy tómen 50 otbasyǵa arnaıy ázirlengen azyq-túlik sómkeleri tabys etildi. Kelýshiler basqosýdan alǵan áserlerin aıtyp, óz rızashylyqtaryn bildirdi.
Osy bir ıgi shara elimizdiń basqa da aımaqtaryndaǵy belsendiler uıymyna Estafeta retinde joldanyp otyr. «Hakim Abaıdyń 175 jyldyǵyna oraı uıymdastyrylyp otyrǵan «Talap, eńbek, tereń oı, qanaǵat, rahym oılap qoı!» atty qaıyrymdylyq sharasy jáne trenıng-semınar Estafetasyn barlyq oblystarǵa joldaımyz!», dep atap ótti QMDB-nyń Nur-Sultan qalasy ókildigine qarasty «Rýhanı jastar» qanatynyń jetekshisi Mahambet Iskanderov.
Sýretterdi «FOTOGALEREIa» aıdarynan kóre alasyzdar!
