Ál-Azhardaǵy qazaq stýdentteriniń rýhanı kezdesý keshi ótti
Kaır qalasynda Ál-Azhar ýnıversıteti ǵalymdarynyń qatysýymen «Islam jáne adal qoǵam» jyly aıasynda, Qazaqstan musylmandary dinı basqarmasy Bas múftıi Naýryzbaı qajy Taǵanuly hazirettiń bastamasymen «Izgilik pen jaýapkershilik joly» taqyrybynda Ál-Azhardaǵy qazaq stýdentteriniń rýhanı kezdesý keshi ótti.
Jıynnyń basynda QMDB-nyń Mysyrdaǵy ókili Rýslan Amantursynuly sóz sóılep, «Islam jáne adal qoǵam» jylynyń mán-mańyzy men qoǵamdaǵy róli týraly keńinen baıandap, jan-jaqty túsindirdi. Sonymen qatar, ol qazaq halqynyń salt-dástúrlerine toqtalyp, ulttyq qundylyqtardyń mańyzyn atap ótti. Sondaı-aq, sharıǵatta keıbir úkimderdiń halyqtyń qalyptasqan salt-dástúrine de negizdelip shyǵarylatynyn jetkizdi.
Atalǵan rýhanı kezdesý Sultan Beıbarys mádenı ortalyǵynda ótti. Sonymen qatar, Ál-Azhar ýnıversıtetiniń Islam jáne quqyq fakýlteti dekany, professor Ato Sýnbatı jáne Kaır ýnıversıteti quqyq fakýltetiniń bólim basshysy doktor Muhammad Ábdýlhadı arnaıy qatysyp, taqyryp aıasynda stýdentterge mańyzdy baıandama jasady.
Kesh barysynda izgilik, jaýapkershilik jáne adaldyq qundylyqtary keńinen nasıhattalyp, jıyn qatysýshylaryna rýhanı serpilis syılaǵan áserli kezdesý boldy. Shara sońynda stýdentterge QMDB ókildigi tarapynan arnaıy dastarqan jaıyldy.
Tirkelgen qoldanýshylar ǵana pikir qaldyra alady. Saıtqa kirý
