«Ál-Ǵanı» meshitinde tabaq tartý dástúri tanystyryldy

Astana qalasyndaǵy «Ál-Ǵanı» meshitinde qazaq halqynyń salt-dástúrin nasıhattaýǵa arnalǵan taǵylymdy is-shara ótti. Jıyn barysynda ulttyq dastarqan ádebi men tabaq tartý dástúriniń máni túsindirildi.

Is-sharaǵa QMDB Din men dástúr bóliminiń meńgerýshisi Nurbek Áýeshanuly, Astana qalasynyń bas ımamy Erbolat Júsipov jáne elorda ımamdary qatysty.

Kezdesý barysynda arnaıy ázirlengen qoı eti jilik-jilikke bólinip, qazaqy jolmen tabaq tartýdyń jón-josyǵy kórsetildi. Ár músheniń óz orny men usynylatyn adamy bolatyny aıtylyp, bas tabaq, syı tabaq jáne ózge de tabaq túrleriniń ereksheligi túsindirildi.

Tabaq tartý dástúriniń mán-maǵynasyna «Sádýaqas qajy Ǵylmanı» meshitiniń naıb ımamy Qondybaı Ákbarov toqtalyp, qazaq halqynyń dastarqan mádenıeti men qonaq kútý ádebi jaıynda nasıhat aıtty.

Is-shara barysynda ulttyq dástúrdi dáripteý, jastarǵa ata saltyn úıretý jáne din men dástúr sabaqtastyǵyn saqtaý jaıy sóz boldy. Jıyn sońynda qatysýshylar dastarqannan dám aýyz tıip, ulttyq qundylyqtarǵa arnalǵan mazmundy kezdesýden áser aldy.