Álıhan Bókeıhan meshitinde medıa ortalyq ashyldy (FOTO)
Qaraǵandy oblysy Temirtaý qalasyndaǵy Álıhan Bókeıhan atyndaǵy ortalyq meshitte medıa ortalyq ashyldy. NAQYL MEDIA dep atalatyn keshenniń ashylýyna Bas múftı Naýryzbaı qajy Taǵanuly arnaıy qatysty.
Bas múftı aldymen jaqynda Alash ardaqtysy Álıhan Bókeıhan atyn ıelengen meshitti aralap, sońǵy jasalǵan qurylys jumystarymen tanysty. Meshittiń bas ımamy Estaı Aıtýǵanuly 11 aıda atqarylǵan jumys esebin berip, aldaǵy josparyn bólisti.
Naýryzbaı qajy Taǵanuly qala ákiminiń orynbasary Samat Saıatulymen birge medıa ortalyqtyń tusaýkeser sharasyna qatysyp, ortalyqpen tanysty.
«Biz ár óńirde «Halyq arna» telearnasynyń fılıaldaryn ashý arqyly dinı kontentti kóbeıtsek deımiz. Sizder jańa tól telearnamyzǵa bir jaǵynan demeý bildirip, sapaly, mazmundy materıal daıyndaýǵa tıissizder. Stýdııalaryńyz bar, osyny sátimen qoldanyp, sapaǵa jumys isteıik» dedi Bas múftı ortalyqtyń ashylýynda.
25 sharshy metrdi alyp jatqan jańa stýdııada ýaǵyz-nasıhat, onlaın dáris, Quran úırený sabaqtary jáne túrli beınerolıkter daıyndalady.
Aıta keteıik, 24 mamyrda Qaraǵandyda bastalǵan Bas múftıdiń resmı sapary Temirtaýda aıaqtaldy. Saparyn qorytyndylaǵan Naýryzbaı qajy Taǵanuly aımaq bas ımamyna naqty tapsyrmalar júktep, birneshe nátıjeli kelisimge qol jetkizdi.
