ALMATYDA «HALAL EXPO-2023» HALYQARALYQ KÓRMESI BASTALDY (FOTO)
Almaty qalasynda QMDB «Halal Damý» standarttaý jáne sertıfıkattaý mekemesiniń uıymdastyrýymen «HALAL EXPO-2023» halyqaralyq kórmesi bastaldy. Kórmeniń resmı ashylýyna Bas múftı Naýryzbaı qajy Taǵanuly arnaıy qatysty.
QMDB Tóraǵasy alǵysózinde «QMDB Halal» sertıfıkatyn ıelengen otandyq jáne sheteldik kásiporyn ókilderine rızashylyǵyn bildirdi.
«Alla Taǵala qasıetti Quranda: «Ýa, adamdar! Jer betindegi nárselerdiń halal ári tazasynan jeńder!» deıdi. Osy aıatqa amal etken kúlli musylmandardyń qarashańyraǵy bolǵan Qazaqstan musylmandary dinı basqarmasy halal kórmesin jyl saıyn árbir óńirde uıymdastyrýda. Buǵan deıin elimizdegi iri megapolıster elordasy – Astana, Shymkent qalasynda ótti.
HALAL EXPO-2023 kórmesi beldi kásiporyndar men bedeldi kásipkerlerdi, qoǵam qaıratkerleri men din mamandaryn, óndirýshiler men tutynýshylardy bir shańyraq astynda biriktiretin mádenı merekeniń shamshyraǵy ispettes. Bul túrli ult pen ulystardyń basyn qosyp, óndirýshiler men tutynýshylardyń arasyn jalǵap, pikir men tájirıbe almasýdaǵy taptyrmas basqosý. Sonymen qatar bul kórme kásiporyndarǵa óz ónimderi men qyzmetterin usynýǵa, tutynýshylarǵa túrli halal ónimmen tanysýǵa, óndirýshilerge ózara áriptestik kelisim ornatýǵa, halal jóninde jańa maǵlumat alýǵa múmkindik beredi» dep atap ótti Naýryzbaı qajy Taǵanuly.
Sondaı-aq Bas múftı saltanatty rásimde úzdik halal kásiporyndar men qyzmetkerlerdi arnaıy marapattady. Odan bólek birqatar qurmetti qonaqtar, sheteldik meımandar sóz sóılep, kórmeniń mańyzdylyǵyna toqtaldy.
Aıta keteıik, eki kúnge sozylatyn kórmege «QMDB Halal» tańbasymen halal ónim óndiretin otandyq kásipkerlermen birge Qyrǵyzstan men Ózbekstan, Reseı men Tatarstan, Belarýs pen Mońǵolııa, Indonezııa men Malaızııa memleketterinen kelgen 100-ge jýyq kásiporynnyń ónimderi (et, qus, sút, balyq, bal, maı ónimderi, jartylaı daıyn jáne kondıterlik ónimder, Halal kosmetıkalar, shujyqtar, BAD, taǵam qospalary, gıgıenalyq zattar, jýǵysh zattar, fast-fýdtar, balmuzdaqtar, sýsyndar, t.b.) qoıylǵan. Kórme Almaty qalasynyń «Baqshasaraı» qabyldaý úıinde ótip jatyr. Shara aıasynda semınar halal salasyna qatysty semınar-trenıngter ótedi.
