ALMATYDA QMDB-NYŃ 35 JYLDYǴYNA ORAI RÝHANI KESh ÓTTI
Búgin Almaty qalasynda QR Ulttyq kitaphanasynda Qazaqstan musylmandary dinı basqarmasynyń 35 jyldyǵyna arnalǵan «Dinı basqarmaǵa – 35 jyl» atty rýhanı kesh ótti.
Rýhanı keshke Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly, sondaı-aq Qazaqstan Jazýshylar odaǵynyń tóraǵasy Mereke Qulkenov, halyq jazýshysy, QMDB Aqsaqaldar keńesiniń múshesi Smaǵul Elýbaı, belgili qoǵam qaıratkeri Marat Toqashbaev, ǵalym-aýdarmashy Záripbaı Jumanuly jáne ardager ımamdar, din qyzmetkerleri, BAQ pen zııaly qaýym ókilderi qatysty.
Kesh barysynda QMDB-nyń 35 jyldyq mereıtoıyna arnalyp túsirilgen derekti fılmniń tusaýkeseri ótip, kórermen nazaryna usynyldy. Sonymen qatar rýhanı basqarmanyń tarıhy men rýhanııat jolyndaǵy qyzmetin aıshyqtaıtyn arnaıy arnaý oryndalyp, kórermenderge sahnalyq kórinis usynyldy.
Bas múftı Naýryzbaı qajy Taǵanuly óz sózinde: «Qazaqstan musylmandary dinı basqarmasy el birligi men rýhanı tutastyqty saqtaý, qoǵamda ımandylyq pen izgilikti nasıhattaý baǵytynda úzdiksiz qyzmet atqaryp keledi. Alǵashqy Bas múftıimiz Rátbek qajy Nysanbaıuly Haziretimiz bastaǵan ult rýhanııatynyń janashyrlarynyń eńbegi búgingi damýdyń berik irgetasyna aınaldy. Odan keıingi kezeńderde de Bas múftılerimiz dástúr sabaqtastyǵyn jalǵastyryp, Dinı basqarmanyń órisin keńeıtip, el múddesine qyzmet etýdiń jańa baǵyttaryn qalyptastyrdy», – dedi.
Aıta keteıik, bıyl Qazaqstan musylmandary dinı basqarmasynyń qurylǵanyna 35 jyl tolyp otyr. Osy mereıli data aıasynda respýblıkamyzda jyl kóleminde túrli rýhanı is-sharalar men konferentsııalar uıymdastyrylýda.
