Aqsaqaldar forýmynyń úndeýi qabyldandy (FOTO)
Elordada Qazaqstan musylmandary dinı basqarmasynyń uıymdastyrýymen ótip jatqan «Qarııalar – el qazynasy» I respýblıkalyq aqsaqaldar forýmynda Úndeý qabyldandy.
Forým Úndeýin Aqparat jáne qoǵammen baılanys bólimi meńgerýshisiniń orynbasary Nurbek Esmaǵanbet oqyp berdi.
«Biz, «Qarııalar – el qazynasy» I respýblıkalyq aqsaqaldar forýmyna qatysýshylar, búgingi sózimizdi qazaq eliniń barsha úlkenderi men jas býyn ókilderine arnaımyz.
«Qarty bar úıdiń qazynasy bar» degen halqymyzdyń ulaǵatty qaǵıdasyn alǵa tarta otyryp, ómirden kórgeni men túıgeni mol qarııalardyń qoǵamdaǵy aqsaqaldyq tulǵasy men tarıhı rólin, abyroı-bedelin arttyrýǵa baǵyttalǵan Qazaqstan musylmandary dinı basqarmasynyń ıgi bastamalaryn qoldaımyz.
Eldiń qamyn oılap, aǵaıyn arasy men jurtshylyqtyń bereke-birligin, yrys-yntymaǵyn aqyl-parasatymen, úlgili ónegesimen jarastyryp kelgen qarııalardyń orny biz úshin qashan da bólek.
Asyl dinimizde úlkendi qurmettep, kishige izet kórsetý – árbir musylmannyń mindeti. Ardaqty Paıǵambarymyz Muhammed (oǵan Allanyń salaýaty men sálemi bolsyn) hadısinde: «Kimde-kim qarııany qurmettese, qartaıǵan shaǵynda ózi de qurmetke bólenedi», – delingen. Sondyqtan qarttarǵa qurmet kórsetý – ata-anańdy syılaǵanmen teń.
Aqsaqaldarymyzdy ardaqtap, qarııalarymyzdy qurmetteý, úlkenderdiń aıtqan aqyl-keńesteri men ósıetterin zer sala tyńdaý – barshamyzǵa ortaq mindet.
Biz, Aqsaqaldar keńesiniń músheleri men búgingi forýmǵa qatysýshylar, barsha qarııalarymyzdy eldiń birligi men berekesiniń uıytqysy bolýǵa, halqymyzdy asyl dinimiz ben ulttyq qundylyqtarymyzǵa qurmetpen qaraýǵa shaqyramyz.
Sondaı-aq jastardy elimizdiń tarıhı-rýhanı muralaryn qadirleýge, ulttyq bolmysymyzǵa jat túrli teris is-áreketter men dinı jat aǵymdardyń yqpalynan saqtanýǵa, ımandylyq pen adamgershilikke, otansúıgishtik pen patrıotızmge, bilim men adal eńbekke úndeımiz» delingen forým Úndeýinde.
Aıta keteıik, «Qarııalar – el qazynasy» I respýblıkalyq aqsaqaldar forýmyna memleket, qoǵam jáne din qaıratkerleri, Aqsaqaldar keńesiniń músheleri qatysyp, baıandama jasady.
