«Aqtóbe» medrese-kolledjiniń oqý ǵımaraty ashyldy (FOTO)
Aıtýly sharaǵa Bas múftıdiń keńesshisi Baltabaı Mekejanov, QMDB Sharıǵat jáne pátýa bóliminiń meńgerýshisi Sansyzbaı Shoqanov, Aqtóbe oblysynyń bas ımamy Tólebı Ospan, «Aqtóbe» medrese-kolledjiniń dırektory Ábdimútáli Dáýrenbekov, Alǵa aýdanynyń ákimi Mamyrǵalı Aqqaǵazov jáne ózge qalalardan kelgen qonaqtar men aýyl aqsaqaldary qatysty.
Oqý ǵımaratynyń ashylý saltanatynda alǵash bolyp sóz alǵan Alǵa aýdanynyń ákimi Mamyrǵalı Aqqaǵazov «Aqtóbe» medrese kolledjiniń Alǵa aýdanyndaǵy dinı turaqtylyqqa qosqan súbeli úlesin erekshe atap ótip, medrese basshylyǵyna alǵysyn bildirdi.
Bas múftı keńesshisi Baltabaı Ýájıtuly quttyqtaýynda jamaǵatqa Bas múftı Naýryzbaı qajy Taǵanulynyń ystyq yqylasy men sálemin jetkizip, záýlim ǵımarattyń ashylýyna demeýshilik jasaǵan barsha kásipkerlerge alǵys bildirdi. Sonymen qatar medrese basshylyǵyna Bas múftı baıǵazysyn tabystady.
Aıta keteıik, jańadan ashylǵan oqý korpýsynyń jalpy aýmaǵy – 2268 sharshy metr. Ǵımarat 3 qabattan turady. Birinshi qabatynda ustazdar jáne dırektor kabıneti men oqý synyptary ornalasqan. Ekinshi qabaty tolyqtaı synyptarǵa arnalǵan. Al úshinshi qabatynda kompıýterlik synyptarmen birge 250 adamǵa arnalǵan májilis zaly, arnaıy kitaphana, esepshi kabınetteri bar.
Ǵımaratta hımııa, fızıka, matemetıka, bıologııa, AÁD synyptary jáne Qazaqstan tarıhy, qazaq, orys tili syndy áleýmettik jáne gýmanıtarlyq pánderge arnalǵan synyptar men arnaıy medpýnkt kabınetteri de qarastyrylǵan.
