ARAQ-ShARAPSYZ ShAHAR: FORÝM ÚNDEÝI QABYLDANDY (FOTO)
Qoja Ahmet Iasaýı babamyzdyń 930 jáne Túrkistan oblysynyń 5 jyldyq mereıtoıyna oraı «Qarııalar – dástúrimniń qazyǵy» taqyrybynda Shymkent qalasy, Túrkistan, Jambyl, Qyzylorda oblystary aqsaqaldary forýmynyń Úndeýi qabyldandy.
«Biz, el aqsaqaldary, ardagerleri retinde Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń taıaýda, qasıetti Ramazan aıy qarsańynda musylman qaýymyna joldaǵan úndeýin negizge ala otyryp, rýhanı qalanyń qalybyn saqtap qalý úshin tómendegi úndeýdi qabyldadyq:
Birinshiden, qasıetti shahardyń mártebesi men bedelin saqtap, halyqty jamandyq ataýlydan, atap aıtqanda, araq-sharap ishýden, qumar oıynnan, kisi aqysyn jeýden, qylmystyq isterden aýlaq bolýǵa;
Ekinshiden, jastardy ulttyq salt-dástúr, tálim-tárbıe negizinde baýlýǵa;
Úshinshiden, el ishinde mádenıet pen parasatty, tazalyq pen adaldyqty nasıhattap, izgi qoǵam qurýǵa shynaıy, dáıekti atsalysýǵa shaqyramyz.
Alla Taǵala musylman balasyna álimsaqtan ishimdik ishýge tyıym salǵan. Qasıetti Qurannyń «Máıda» súresi 90-91-aıattarynda: «Ýa, ıman keltirgender! Ishimdik ishý, qumar oınaý, putqa tabyný, oqpen bal ashyp básekelesý – shaıtan isi, jıirkenishti qylyqtar. Baqytqa jetem degender shaıtan isinen aýlaq bolyńdar. Sol ishimdik, qumar oınaý arqyly shaıtan senderdiń aralaryńa dushpandyq týdyrady, senderdiń namaz oqýlaryńa kedergi jasamaq bolady. Allany esterińnen shyǵarýǵa tyrysady. Ishimdik pen qumar oınaýdan sonda da bezbeısińder me?» – dep eskertedi.
Ardaqty Paıǵambarymyz (oǵan Allanyń salaýaty men sálemi bolsyn): «Ishimdik – barlyq jamandyq ataýlynyń bastaýy» dep saqtandyrǵan. Ishimdiktiń saldary urys-keriske, shańyraqtardyń shaıqalýyna, qoǵamynyń azǵyndaýyna, qylmystyq isterge ıtermeleıdi» delingen Úndeý mátininde. Forým Úndeýin belgili ǵalym Dosaı Kenjetaı oqyp berdi.
Aıta ketsek, Túrkistanda ótken forýmǵa QMDB Tóraǵasy, Bas múftı Naýryzbaı qajy Taǵanuly, Dinı basqarma janyndaǵy Aqsaqaldar keńesiniń Jambyl, Qyzylorda, Túrkistan oblystary men Shymkent qalasyndaǵy músheleri, memleket jáne qoǵam qaıratkerleri, din qyzmetkerleri qatysty.
