ASTANA IMAMDARYNA KÓLIKTI KÓLIKKE AIYRBASTAÝDYŃ ÚKIMI TÚSINDIRILDI (FOTO)
Astana qalasy ókildigine qarasty «Áziret Sultan» meshitinde elordalyq din qyzmetkerlerine «Barter», ıaǵnı kólikti kólikke aıyrbastaýdyń úkimi túsindirildi.
Hanafı mázhaby boıynsha bir jynysty zattardy aıyrbastaý barysynda esesin keshiktirýge nemese nesıege berýge bolmaıdy. Iaǵnı, mysaly, bir qoıdy eki qoıǵa aıyrbastaǵanda ol qolma-qol jasalýy shart. Bul jóninde Samýra ıbn Jýndýbtan jetken rıýaıatta: «Alla Elshisi (oǵan Allanyń salaýaty men sálemi bolsyn) janýardy janýarǵa satý barysynda esesin keshiktirip berýge tyıym saldy», – delingen.
Ǵulamalar keńesiniń túsindirýinshe, sıpaty men sapasynda aıyrmashylyǵy bar bir markaly nemese ártúrli markaly kólikterdi bir-birine ústeme aqsha qosyp aýystyrýǵa ruqsat etiledi. Sondaı-aq taraptardyń kelisimimen eshqandaı ústemesiz de aıyrbastaýǵa bolady.
Máselen, bir fabrıka shyǵarǵan kıim ekinshi fabrıka óniminen materıaly nemese sapasy jaǵynan ózgeshe bolýy múmkin. Sol sekildi ártúrli avtokólikterdiń erekshelikteri eskerilip, aıyrbas sharıǵat talaptaryna saı júrgizilýi tıis.
