«Astana» medrese-kolledjiniń qyzdar bólimi ashyldy (FOTO)

10 qyrkúıek 2019 244 0
Оqý rejımi

Elordada «Astana» medrese-kolledjiniń qyzdar bóliminiń saltanatty ashylý rásimi ótti.

Bilim ordasynyń ashylý sharasyna Qazaqstan musylmandary dinı basqarmasynyń tóraǵasy, Bas múftı Serikbaı qajy Oraz, QMDB tóraǵasynyń birinshi orynbasary, naıb múftı, Nur-Sultan qalasynyń Bas ımamy Naýryzbaı qajy Ótpenov, qoǵam qaıratkeri Orazgúl Asanǵazyqyzy, elordalyq ımamdar men dinge janashyr qala turǵyndary qatysty.

Bas múftı jańa ortalyqtyń ashylýymen quttyqtap, el astanasynda tuńǵysh ashylǵan bilim ordasynyń rýhanııatymyzdaǵy mańyzy jaıynda toqtala kele:

«Áıel-analarymyz jan-jaqty bilimdi bolsa, bolashaq urpaqty da solaı tárbıeleıdi. Jańa medresemizdi ashýdaǵy negizgi maqsat – dástúrli dinimizdi saltymyzben sabaqtastyryp, tarıhı, rýhanı qundylyqtarymyzdy dáripteıtin mamandar tárbıeleý. Búginde elimiz boıynsha 1500 shákirtimiz ýnıversıtette oqyp jatyr, 2500-ge jýyq shákirt orta bilim beretin medrese-kolledjderimizde bilim alýda. Demek, biz otandyq kadrlardy daıarlaýǵa tolyqqandy múmkindigimiz bar. Biz syrttan keletin dinı kadrlar men sheteldik teologtarǵa muqtajdyqtan tolyqtaı aryldyq», – dep atap ótti.

Qoǵam qaıratkeri Orazkúl Asanǵazyqyzy qyzdarǵa arnalǵan oqý ordasynyń ashylýymen quttyqtap:

«Abaı atamyz otyz jetinshi qara sózinde «Adamdyqtyń qaryzy úshin eńbek qylsań, Allanyń súıgen qulynyń biri bolasyń» deıdi. Elge qyzmet etetin, jeti jurttyń qamyn jeıtin adamnyń balasyn tárbıeleıtin jan mindetti túrde ımandy bolýy kerek. Táýelsizdik qazaqqa ne berdi desek, áýeli qıraǵan meshitterimizdi qalpyna keltirdi dep qýanyshpen aıta alamyz. Eldiń qamyn oılaıtyn tulǵa alyp anadan týady. Osy jerden alyp analar shyǵýyna tilektespin», – dedi.

Ǵımaratta oqý zaly, ashana, jataqhana, alǵashqy medıtsınalyq kómek kórsetetin bólme, ustazdar kabıneti bar. Nur-Sultan qalasynda alǵash ret ashylǵan oqý ortalyǵyna bıyl 21 shákirt bilim alatyn bolady.

Pіkіrler Kіrý