«Astana» medrese-kolledjiniń jańa ǵımaraty paıdalanýǵa berildi (FOTO+VIDEO)

10 qyrkúıek 2019 9666 0
Оqý rejımi

Búgin Elorda rýhanııaty tarıhyndaǵy aq túıeniń qarny jarylǵan aqjoltaı kún boldy. Elimizdiń Bas shaharyndaǵy dinı bilim berý júıesiniń jańa satyǵa kóterilip, jan-jaqty damýynyń belgisindeı bolǵan saltanatty sharalar birinen soń biri qatar ótip, Elorda jurtshylyǵynyń qýanyshyn molaıta tústi.

Jamaǵat rızalyǵyn týdyrǵan jaǵymdy jańalyqtardyń legi «Áljan ana» meshiti janynan «Astana» medrese-kolledjiniń Qyzdar bóliminiń ashylýymen bastaldy. 2007 jyly Elbasy N.Nazarbaevtyń qoldaýymen ashylǵan «Astana» medresesi búginge tańǵa deıin segiz márte túlekterin ushyryp, elimizdiń dinı kadr daıarlaý jumysyna úlken úles qosyp keledi. Sońǵy jyldary orys tili bólimi iske qosylyp, jańa oqytý júıesi qalyptasqan bolatyn.

Bıylǵy jyly Nur-Sultan qalasy ókildiginiń bastamasymen «Astana» medrese kolledjiniń Qyzdar bólimi ashylyp, synaq emtıhanynan súrinbeı ótken 22 qyz oqýǵa qabyldanǵan bolatyn. QMDB tóraǵasy, Bas múftı Serikbaı qajy Oraz bastaǵan QMDB qyzmetkerleri men qala ımamdarynyń, zııaly qaýym ókilderi men Elorda jamaǵatynyń qatysýymen búgin «Áljan ana» meshiti janynan Qyzdar medresesi saltanatty túrde ashylyp, kópshiliktiń aq batasymen jumysy bastaldy.

Sondaı-aq, sońǵy jyldary medresege túsýge talap bildirgen shákirtter sanynyń kóbeıýine oraı «Astana» medrese-kolledji jańa oqý jylynda jańa ǵımaratqa qonys aýdardy. Ashylý saltanatynda Sóz sóılegen Serikbaı qajy Oraz qazirgi tańda Qazaqstan musylmandary dinı basqarmasynyń eldegi dinı kadr daıarlaý isiniń bir júıege túskenin aıtyp, syrttan shaqyrylatyn mamandarǵa zárýlik joǵyn jetkizdi. Bilim jolyndaǵy shákirtterge aq batasyn arnap, úzdik oqýlaryna tilektestigin bildirdi.

Elorda tarıhyndaǵy aıryqsha oqıǵaǵa qala ákimi Altaı Kólginov te óz tileýlestigin bildirip, arnaıy quttyqtaý lebizin joldady. Nur-Sultan qalasy Qoǵamdyq damý isteri basqarmasynyń bólim bastyǵy Nurdáýlet Álmuqan saltanatty shara aıasynda jamaǵatqa shahar basshysynyń quttyqtaýyn oqyp berip, QMDB basshylyǵy men medrese ujymyna alǵysyn jetkizdi.

Úsh qabattan turatyn jańa ǵımarat ishinde shákirtter úshin barlyq qolaıly jaǵdaı jasalǵan. Demeýshi azamatardyń qoldaýymen barlyq jatyn bólmeler men oqý zaldary, kitaphana men dáris bólmeleri, sporttyq jattyǵý zaldary men arnaıy ınformatıka kabıneti túgeldeı jańa jıhazben jabdyqtalǵan. Sondaı-aq, medrese basshylyǵynyń uıymdastyrýymen shuǵyl medıtsınalyq kómek kórsetetin arnaıy dárigerlik bólme de ashylyp otyr.

Sýretterdi «FOTOGALEREIa» aıdarynan kóre alasyzdar!

 

Pіkіrler Kіrý