Astana meshitterinde 1 200 janǵa «Qaıyrymdylyq dastarhany» jaıyldy (FOTO+VIDEO)

Ardaqty Alla elshisi (s.ǵ.s.) dúnıege kelgen Máýlit aıynyń qurmetine oraı búgin Astana meshitterinde «Qaıyrymdylyq dastarhany» jaıylyp, Elordamyzdaǵy muqtaj otbasylar qulshylyq ordalarynda qonaq bolyp qaıtty. QMDB-nyń Astana qalasyndaǵy ókildigi men «Zeket» qory ókildiginiń uıymdastyrýymen ótken qaıyrymdylyq sharasy Astana qalasyndaǵy «Áziret Sultan», «S.Ǵylmanı», «Tólebaı» jáne «Ás-Sálam» meshitterinde bir mezgilde bastalyp, jalpy sany 1 200 jandy qamtydy. Demeýshi azamattardyń qarjylaı qoldaýymen júzege asqan ıgi bastama aıasynda «Áziret Sultan» meshitindegi «Qaıyrymdylyq dastarhanynan» 600 jan dám tatsa, qalǵan úsh qulshylyq ordasynyń árqaısysyna 200-deı muqtaj jandar meıman bolyp qaıtty.

Bas meshittegi «Qaıyrymdylyq dastarhanyna» jıylǵan jamaǵatty QMDB tóraǵasynyń Birinshi orynbasary, Astana qalasy jáne «Áziret Sultan» meshitiniń Bas ımamy Naýryzbaı qajy Taǵanuly ózi qarsy alyp, iltıpat tanytty. Qasıetti Quran aıattarymen bastalǵan berekeli dastarhan basynda naıb múftı Naýryzbaı Taǵanuly búgingi qaıyrymdylyq sharasynyń mán-mańyzyna toqtalyp, demeýshilik tanytqan azamattarǵa alǵysyn bildirdi. Sondaı-aq, bul ıgi sharanyń aldaǵy ýaqytta dástúrli túrde Astana meshitterinde turaqty ótkizilip turatynyn da jetkizdi.

Berekeli dastarhan basynda jamaǵatqa merekelik kóńil-kúı syılaý maqsatynda terme aıtylyp, izgi tilekter tolqynyna da kezek berildi. Astana meshitteri atynan jaıylǵan búgingi dastarhanǵa dán rıza bolǵan jamaǵat ta ortaǵa shyǵyp, óz rızashylyqtaryn jetkizip jatty.

Sýretterdi «FOTOGALEREIa» aıdarynan kóre alasyzdar!